کر چکے برباد دل کو فکر کیا انجام کی

کر چکے برباد دل کو فکر کیا انجام کی

اب ہمیں دے دو یہ مٹی ہے ہمارے کام کی

ڈوب دے دے بادۂ گل رنگ میں زاہد اگر

دیکھیے رنگینیاں پھر جامۂ احرام کی

عکس ابرو دیکھتے ہیں بادۂ سرجوش میں

عید ہے ساقی پرستوں میں ہلال جام کی

ابتدائے عشق ہے اور بجھ رہا ہے دل مرا

ہو چلی دھیمی ابھی سے لو چراغ شام کی

آنکھ میں آنسو ہیں ماتھے پر عرق ہے موت کا

لے خبر عمر رواں اپنے چھلکتے جام کی

ہو گئی بازیچۂ اطفال بے ذوق و شعور

شاعری جو تھی مرادف معنی الہام کی

پختگی سمجھے ہوئے ہیں جو تناسب کو فقط

چاہیے اصلاح ان کو اس خیال خام کی

ہے یہ نازک فن جو شایان تہی مغزی نہیں

دور مجلس میں ضرورت کیا ہے خالی جام کی

ٔہے عزیزؔ آئینۂ لفظی مراعات النظیر

حسن معنی جب نہیں پھر شاعری کس کام کی

kar chuke barbad dil ko fikr kya anjam ki

ab hamen de do ye mitti hai hamare kam ki

dub de de bada-e-gul rang mein zahid agar

dekhiye ranginiyan phir jama-e-ehram ki

aks-e-abru dekhte hain bada-e-sarjosh mein

eid hai saqi paraston mein hilal-e-jam ki

ibtida-e-ishq hai aur bujh raha hai dil mira

ho chali dhimi abhi se lo charagh-e-sham ki

ankh mein ansu hain mathe par araq hai maut ka

le khabar umr-e-rawan apne chhalakte jam ki

ho gai bazicha-e-atfal be zauq-o-shuur

shayari jo thi muradif maani-e-ilham ki

pukhtagi samjhe hue hain jo tanasub ko faqat

chahiye islah un ko is khayal-e-kham ki

hai ye nazuk fan jo shayan-e-tahi maghza nahin

dur majlis mein zarurat kya hai khali jam ki

hai aziz aina-e-lafzi muraat alnnazir

husn-e-maani jab nahin phir shayari kis kam ki