کرتے ہیں چین بیٹھے حسن و جمال والے

کرتے ہیں چین بیٹھے حسن و جمال والے

پھرتے ہیں مارے مارے کیا کیا کمال والے

میری طرح سے ایک دن بازار سے جہاں کے

جاویں گے ہاتھ خالی جتنے ہیں تال والے

دم دے کے پھانستا ہے عشاق کے دنوں کو

میں جانتا ہوں تجھ کو زلفوں کے جال والے

محشر کا معرکہ ہو جس دم جہاں کے اندر

اس دن ہمیں بچانا او لمبی ڈھال والے

بلبل ہیں تیرے ہم بھی باغ جہاں کے اندر

او گل سے گال والے سنبل سے بال والے

تنہا لحد کے اندر ہوں گے گدا کی صورت

جتنے ہیں اس جہاں میں جاہ و جلال والے

زلف شب جدائی تیری بری بلا ہے

اس کا خیال رکھنا او لمبے بال والے

عاشق ہیں ہم بھی تیرے ابرو کے اور رخ کے

ہم کو بھی یاد رکھنا بدر و ہلال والے

بھولے ہیں دو جہاں کو سد بد نہیں کسی کی

جو جو ہیں اس جہاں میں تیرے خیال والے

صیاد نے بچھایا گلشن میں دام و دانہ

سن گلعذار والے او خط و خال والے

میری طرح سے اک دن بازار سے جہاں کے

جائیں گے ہاتھ خالی جتنے ہیں مال والے

منصور و قیس و وامق فرہاد و منتہیؔ سے

کیا کیا گئے جہاں سے فضل و کمال والے

karte hain chain baithe husn-o-jamal wale

phirte hain mare mare kya kya kamal wale

meri tarah se ek din bazar se jahan ke

jawenge hath khali jitne hain tal wale

dam de ke phansta hai ushshaq ke dinon ko

main janta hun tujh ko zulfon ke jal wale

mahshar ka marka ho jis dam jahan ke andar

us din hamen bachana o lambi dhal wale

bulbul hain tere ham bhi bagh-e-jahan ke andar

o gul se gal wale sumbul se bal wale

tanha lahad ke andar honge gada ki surat

jitne hain is jahan mein jah-o-jalal wale

zulf-e-shab-e-judai teri buri bala hai

us ka khayal rakhna o lambe bal wale

ashiq hain ham bhi tere abru ke aur rukh ke

ham ko bhi yad rakhna badr-o-hilal wale

bhule hain do jahan ko sadd-e-bad nahin kisi ki

jo jo hain is jahan mein tere khayal wale

sayyad ne bichhaya gulshan mein dam-o-dana

sun gulizar wale o khat-o-khal wale

meri tarah se ik din bazar se jahan ke

jaenge hath khali jitne hain mal wale

mansur-o-qais-o-wamiq farhad-o-muntahi se

kya kya gae jahan se fazl-o-kamal wale