کر دیا زلف پریشاں سا پریشاں مجھ کو

کر دیا زلف پریشاں سا پریشاں مجھ کو

دشت میں چھوڑ گیا ہے دل ناداں مجھ کو

داغ یاران وطن تھا جو دل محزوں میں

وہ نظر آیا چراغ تہ داماں مجھ کو

جاں کنی سے کہیں اچھا ہے مرا مر جانا

نیم بسمل نہ بنا ناوک مژگاں مجھ کو

جلوۂ صبح قیامت کا مزہ دیتا ہے

چاک دل چاک جگر چاک گریباں مجھ کو

مرغ دل دام میں گیسو کے الجھ کر نہ کہے

ہو مبارک تمہیں گلشن تو یہ زنداں مجھ کو

جلوۂ حسن خدا داد دکھا کر دلبر

مثل آئینہ کیا آپ نے حیراں مجھ کو

اپنا اپنا یہ مقدر ہے کہوں کیا واعظ

محفل وعظ تجھے محفل رنداں مجھ کو

اپنی تنہائی پہ روتا ہوں بڑی حسرت سے

اپنا پہلو جو نظر آتا ہے ویراں مجھ کو

غنچۂ زخم جگر کھل کے دکھا دیتے ہیں

چمن عشق صنم کا گل خنداں مجھ کو

میہماں گوشۂ تربت کا مجھے ہونا ہے

کیوں نہ مرغوب ہو یہ گور غریباں مجھ کو

منتیں موت کی کرتا ہوں تو وہ کہتی ہے

زندگی نے تو کیا تیرا نگہباں مجھ کو

شعر گوئی نہیں سیکھی ہے جمیلہؔ میں نے

میری فطرت نے کیا صاحب دیواں مجھ کو

kar diya zulf-e-pareshan sa pareshan mujh ko

dasht mein chhor gaya hai dil-e-nadan mujh ko

dagh yaran-e-watan tha jo dil-e-mahzon mein

wo nazar aya charagh-e-tah-e-daman mujh ko

jan kini se kahin achchha hai mira mar jana

nim bismil na bana nawak-e-mizhgan mujh ko

jalwa-e-subh-e-qayamat ka maza deta hai

chak-e-dil chak-e-jigar chak-e-gareban mujh ko

murgh-e-dil dam mein gesu ke ulajh kar na kahe

ho mubarak tumhen gulshan to ye zindan mujh ko

jalwa-e-husn khuda dad dikha kar dilbar

misl-e-aina kiya ap ne hairan mujh ko

apna apna ye muqaddar hai kahun kya waiz

mahfil-e-waaz tujhe mahfil-e-rindan mujh ko

apni tanhai pe rota hun bari hasrat se

apna pahlu jo nazar ata hai wiran mujh ko

ghuncha-e-zakhm-e-jigar khul ke dikha dete hain

chaman-e-ishq sanam ka gul-e-khandan mujh ko

mehman gosha-e-turbat ka mujhe hona hai

kyun na marghub ho ye gor-e-ghariban mujh ko

minnaten maut ki karta hun to wo kahti hai

zindagi ne to kiya tera nigahban mujh ko

sher goi nahin sikhi hai jamilahu main ne

meri fitrat ne kiya sahab-e-diwan mujh ko