کر دیا زار غم عشق نے ایسا مجھ کو

کر دیا زار غم عشق نے ایسا مجھ کو

موت آئی بھی تو بستر پہ نہ پایا مجھ کو

کبھی جنگل کبھی بستی میں پھرایا مجھ کو

آہ کیا کیا نہ کیا عشق نے رسوا مجھ کو

دشمن جاں ہوا در پردہ مرا جذبۂ عشق

منہ چھپانے لگے وہ جان کے شیدا مجھ کو

روز روشن ہو نہ کیوں کر مری آنکھوں میں سیاہ

ہے ترے گیسوئے شب رنگ کا سودا مجھ کو

اک پری رو کی محبت کا میں ہوں دیوانہ

نہ پری کا نہ کسی جن کا ہے سایہ مجھ کو

روز و شب شوخ نے کیا کیا نہ دکھائے نیرنگ

رخ دکھایا کبھی گیسوئے چلیپا مجھ کو

دن بھلے آئے تو اعدا سبب خیر ہوئے

بد دعا نے کیا اغیار کی اچھا مجھ کو

فخر سے بزم بتاں میں وہ کہا کرتے ہیں

پیار کچھ روز سے اب کرتے ہیں رعناؔ مجھ کو

kar diya zar-e-gham-e-ishq ne aisa mujh ko

maut ai bhi to bistar pe na paya mujh ko

kabhi jangal kabhi basti mein pharaya mujh ko

ah kya kya na kiya ishq ne ruswa mujh ko

dushman-e-jan hua dar parda mira jazba-e-ishq

munh chhupane lage wo jan ke shaida mujh ko

roz-e-raushan ho na kyun kar miri ankhon mein siyah

hai tire gesu-e-shab rang ka sauda mujh ko

ik pari ru ki mohabbat ka main hun diwana

na pari ka na kisi jin ka hai saya mujh ko

roz-o-shab shokh ne kya kya na dikhae nairang

rukh dikhaya kabhi gesu-e-chalepa mujh ko

din bhale ae to aada sabab-e-khair hue

bad dua ne kiya aghyar ki achchha mujh ko

fakhr se bazm-e-butan mein wo kaha karte hain

pyar kuchh roz se ab karte hain raana mujh ko