کر چکا قید سے جس وقت کہ آزاد مجھے

کر چکا قید سے جس وقت کہ آزاد مجھے

ہاتھ ملتا ہی رہا دیکھ کے صیاد مجھے

عمر بھر یوں تو کبھی لی بھی نہ کروٹ پس مرگ

حیف رہ رہ کے کیا کرتے ہیں اب یاد مجھے

حکم درباں کو ہے زنہار نہ آنے پائے

غیر کے سامنے کرتے ہیں مگر یاد مجھے

باغباں گلشن عالم کا میں وہ بلبل ہوں

طائر سدرہ کہا کرتا ہے استاد مجھے

ہم صفیروں کو مرا حال کھلے گا پس مرگ

دیکھنا دل میں کریں گے وہ بہت یاد مجھے

صحن گلشن میں مرے پھول کریں گے گلچیں

روئے گا سونا قفس دیکھ کے صیاد مجھے

راہ الفت میں ملاقات ہوئی کس کس سے

دشت میں قیس ملا کوہ میں فرہاد مجھے

غیب سے ہوتے ہیں القا مرے دل میں مضمون

دیکھ فیضان سخن کا ہے خداداد مجھے

سبز باغ آتا ہے دنیا کا نظر جب رعناؔ

یاد آتی ہے بہت حسرت شداد مجھے

kar chuka qaid se jis waqt ke azad mujhe

hath milta hi raha dekh ke sayyad mujhe

umr bhar yun to kabhi li bhi na karwat pas-e-marg

haif rah rah ke kiya karte hain ab yad mujhe

hukm darban ko hai zinhar na ane pae

ghair ke samne karte hain magar yad mujhe

baghban gulshan-e-alam ka main wo bulbul hun

tair-e-sidra kaha karta hai ustad mujhe

ham safiron ko mira hal khulega pas-e-marg

dekhna dil mein karenge wo bahut yad mujhe

sehn-e-gulshan mein mire phul karenge gulchin

roega sona qafas dekh ke sayyad mujhe

rah-e-ulfat mein mulaqat hui kis kis se

dasht mein qais mila koh mein farhad mujhe

ghaib se hote hain alqa mire dil mein mazmun

dekh faizan-e-sukhan ka hai khudadad mujhe

sabz-e-bagh ata hai duniya ka nazar jab raana

yad ati hai bahut hasrat-e-shaddad mujhe