کرتی ہے مجھے قتل مرے یار کی رفتار

کرتی ہے مجھے قتل مرے یار کی رفتار

تلوار کی تلوار ہے رفتار کی رفتار

کج ایسی نہ تھی آگے مرے یار کی رفتار

سیکھا ہے مگر چرخ ستم گار کی رفتار

سر گرتے ہیں کٹ کٹ کے وہ رکھتا ہے جہاں پاؤں

سیکھی ہے مگر یار نے تلوار کی رفتار

گردش ہے تری نرگس بیمار کو دن رات

دیکھی نہیں ایسی کسی بیمار کی رفتار

ٹلتی نہیں زلفوں کے تصور کی طرح سے

ہے طرفہ جدائی کی شب تار کی رفتار

لغزش نہ ہو کیوں کر رہ دیں میں مجھے زاہد

یاد آ گئی اس کافر مے خوار کی رفتار

ظالم ترے کوچے سے قدم اٹھ نہیں سکتا

کیوں کر نہ چلوں سایۂ دیوار کی رفتار

کیا مار کو نسبت ترے گیسو کے چلن سے

ہے سایۂ گیسو میں صنم مار کی رفتار

موتی عوض نقش قدم گرتے ہیں ناسخؔ

ایسی ہے مری کلک گہر بار کی رفتار

karti hai mujhe qatl mire yar ki raftar

talwar ki talwar hai raftar ki raftar

kaj aisi na thi age mire yar ki raftar

sikha hai magar charkh-e-sitam gar ki raftar

sar girte hain kat kat ke wo rakhta hai jahan paon

sikhi hai magar yar ne talwar ki raftar

gardish hai tiri nargis-e-bimar ko din rat

dekhi nahin aisi kisi bimar ki raftar

talti nahin zulfon ke tasawwur ki tarah se

hai turfa judai ki shab-e-tar ki raftar

laghzish na ho kyun kar rah den mein mujhe zahid

yad a gai us kafir mai khwar ki raftar

zalim tire kuche se qadam uth nahin sakta

kyun kar na chalun saya-e-diwar ki raftar

kya mar ko nisbat tire gesu ke chalan se

hai saya-e-gesu mein sanam mar ki raftar

moti ewaz-e-naqsh-e-qadam girte hain nasikh

aisi hai miri kilk-e-guhar bar ki raftar