کر نالہ کشی کب تئیں اوقات گزاریں

کر نالہ کشی کب تئیں اوقات گزاریں

فریاد کریں کس سے کہاں جا کے پکاریں

ہر دم کا بگڑنا تو کچھ اب چھوٹا ہے ان سے

شاید کسی ناکام کا بھی کام سنواریں

دل میں جو کبھو جوش غم اٹھتا ہے تو تا دیر

آنکھوں سے چلی جاتی ہیں دریا کی سی دھاریں

کیا ظلم ہے اس خونی عالم کی گلی میں

جب ہم گئے دو چار نئی دیکھیں مزاریں

جس جا کہ خس و خار کے اب ڈھیر لگے ہیں

یاں ہم نے انہیں آنکھوں سے دیکھیں ہیں بہاریں

کیوں کر کے رہے شرم مری شہر میں جب آہ

ناموس کہاں اتریں جو دریا پہ ازاریں

وے ہونٹ کہ ہے شور مسیحائی کا جن کی

دم لیویں نہ دو چار کو تا جی سے نہ ماریں

منظور ہے کب سے سر شوریدہ کا دینا

چڑھ جائے نظر کوئی تو یہ بوجھ اتاریں

بالیں پہ سر اک عمر سے ہے دست طلب کا

جو ہے سو گدا کس کنے جا ہاتھ پساریں

ان لوگوں کے تو گرد نہ پھر سب ہیں لباسی

سو گز بھی جو یہ پھاڑیں تو اک گز بھی نہ واریں

ناچار ہو رخصت جو منگا بھیجی تو بولا

میں کیا کروں جو میرؔ جی جاتے ہیں سدھاریں

kar nala kashi kab tain auqat guzaren

fariyad karen kis se kahan ja ke pukaren

har dam ka bigarna to kuchh ab chhota hai un se

shayad kisi nakam ka bhi kam sanwaren

dil mein jo kabhu josh-e-gham uthta hai to ta der

ankhon se chali jati hain dariya ki si dharen

kya zulm hai is khuni alam ki gali mein

jab ham gae do char nai dekhen mazaren

jis ja ke khas-o-khar ke ab dher lage hain

yan ham ne unhen ankhon se dekhen hain baharen

kyun kar ke rahe sharm miri shahr mein jab ah

namus kahan utren jo dariya pe izaren

we hont ke hai shor masihai ka jin ki

dam lewen na do char ko ta ji se na maren

manzur hai kab se sar-e-shorida ka dena

charh jae nazar koi to ye bojh utaren

balin pe sar ik umr se hai dast-e-talab ka

jo hai so gada kis kanne ja hath pasaren

un logon ke to gard na phir sab hain libasi

so gaz bhi jo ye pharen to ik gaz bhi na waren

nachar ho rukhsat jo manga bheji to bola

main kya karun jo mir ji jate hain sidharen