کرتے ہی نہیں ترک بتاں طور جفا کا

کرتے ہی نہیں ترک بتاں طور جفا کا

شاید ہمیں دکھلاویں گے دیدار خدا کا

ہے ابر کی چادر شفقی جوش سے گل کے

میخانے کے ہاں دیکھیے یہ رنگ ہوا کا

بہتیری گرو جنس کلالوں کے پڑی ہے

کیا ذکر ہے واعظ کے مصلیٰ و ردا کا

مر جائے گا باتوں میں کوئی غم زدہ یوں ہی

ہر لحظہ نہ ہو ممتحن ارباب وفا کا

تدبیر تھی تسکیں کے لیے لوگوں کی ورنہ

معلوم تھا مدت سے ہمیں نفع دوا کا

ہاتھ آئینہ رویوں سے اٹھا بیٹھیں نہ کیوں کر

بالعکس اثر پاتے تھے ہم اپنی دعا کا

آنکھ اس کی نہیں آئینے کے سامنے ہوتی

حیرت زدہ ہوں یار کی میں شرم و حیا کا

برسوں سے تو یوں ہے کہ گھٹا جب امنڈ آئی

تب دیدۂ تر سے بھی ہوا ایک جھڑاکا

آنکھ اس سے نہیں اٹھنے کی صاحب نظروں کی

جس خاک پہ ہوگا اثر اس کی کف پا کا

تلوار کے سائے ہی میں کاٹے ہے تو اے میرؔ

کس دل زدہ کو ہوئے ہے یہ ذوق فنا کا

karte hi nahin tark-e-butan tur jafa ka

shayad hamen dikhlawenge didar khuda ka

hai abr ki chadar shafaqi josh se gul ke

maikhane ke han dekhiye ye rang hawa ka

bahuteri giro jins-e-klalon ke pari hai

kya zikr hai waiz ke musalli-o-rida ka

mar jaega baton mein koi gham zada yun hi

har lahza na ho mumtahin arbab-e-wafa ka

tadbir thi taskin ke liye logon ki warna

maalum tha muddat se hamen nafa dawa ka

hath aina rawiyon se utha baithen na kyun kar

bilaks asar pate the ham apni dua ka

ankh us ki nahin aine ke samne hoti

hairat zada hun yar ki main sharm-o-haya ka

barson se to yun hai ke ghata jab umand ai

tab dida-e-tar se bhi hua ek jharaka

ankh us se nahin uthne ki sahab nazron ki

jis khak pe hoga asar us ki kaf-e-pa ka

talwar ke sae hi mein kate hai to ai mir

kis dil zada ko hue hai ye zauq-e-fana ka