کاٹوں گا شب تڑپ کر رو کر سحر کروں گا

کاٹوں گا شب تڑپ کر رو کر سحر کروں گا

فرقت میں تیری جاناں یوں ہی بسر کروں گا

کہتا ہے عشق دلبر فرقت میں ہو نہ مضطر

دل میں گزر کروں گا آنکھوں میں گھر کروں گا

آتا نہیں وہ دلبر کہتا ہے روز مجھ سے

آنے کی اپنے تجھ کو پہلے خبر کروں گا

تم جا رہے ہو جاؤ اے بت مرا خدا ہے

سینے کو رنج فرقت پتھر جگر کروں گا

قطروں میں چشم تر کے تصویر دل ربا ہے

حسرت سے کیوں نہ اس کی جانب نظر کروں گا

عاشق کا قافلہ اب جاتا ہے ان کے در پر

بانگ جرس بنوں گا نالوں کو سر کروں گا

تربت کو دیکھ کر میں کہتا ہوں اے جمیلہؔ

اے گور میں بھی تیرا آباد گھر کروں گا

katunga shab tarap kar ro kar sahar karunga

furqat mein teri janan yun hi basar karunga

kahta hai ishq dilbar furqat mein ho na muztar

dil mein guzar karunga ankhon mein ghar karunga

ata nahin wo dilbar kahta hai roz mujh se

ane ki apne tujh ko pahle khabar karunga

tum ja rahe ho jao ai but mira khuda hai

sine ko ranj-e-furqat patthar jigar karunga

qatron mein chashm-e-tar ke taswir dil ruba hai

hasrat se kyun na us ki janib nazar karunga

ashiq ka qafila ab jata hai un ke dar par

bang-e-jaras banunga nalon ko sar karunga

turbat ko dekh kar main kahta hun ai jamilahu

ai gor mein bhi tera abad ghar karunga