آ گئے پھر ترے ارمان مٹانے ہم کو

آ گئے پھر ترے ارمان مٹانے ہم کو

دل سے پہلے یہ لگا دیں گے ٹھکانے ہم کو

سر اٹھانے نہ دیا حشر کے دن بھی ظالم

کچھ ترے خوف نے کچھ اپنی وفا نے ہم کو

کچھ تو ہے ذکر سے دشمن کے جو شرماتے ہیں

وہم میں ڈال دیا ان کی حیا نے ہم کو

ظلم کا شوق بھی ہے شرم بھی ہے خوف بھی ہے

خواب میں چھپ کے وہ آتے ہیں ستانے ہم کو

چار داغوں پہ نہ احسان جتاؤ اتنا

کون سے بخش دیئے تم نے خزانے ہم کو

بات کرنے کی کہاں وصل میں فرصت بیخودؔ

وہ تو دیتے ہی نہیں ہوش میں آنے ہم کو

a gae phir tire arman mitane ham ko

dil se pahle ye laga denge thikane ham ko

sar uthane na diya hashr ke din bhi zalim

kuchh tire khauf ne kuchh apni wafa ne ham ko

kuchh to hai zikr se dushman ke jo sharmate hain

wahm mein dal diya un ki haya ne ham ko

zulm ka shauq bhi hai sharm bhi hai khauf bhi hai

khwab mein chhup ke wo ate hain satane ham ko

char daghon pe na ehsan jatao itna

kaun se bakhsh diye tum ne khazane ham ko

bat karne ki kahan wasl mein fursat bekhud

wo to dete hi nahin hosh mein ane ham ko