پیغام زندگی نے دیا موت کا مجھے

پیغام زندگی نے دیا موت کا مجھے

مرنے کے انتظار میں جینا پڑا مجھے

اس انقلاب کی بھی کوئی حد ہے دوستو

نا آشنا سمجھتے ہیں اب آشنا مجھے

کشتی پہنچ سکے گی یہ تا ساحل مراد

دھوکا نہ دے خدا کے لیے نا خدا مجھے

وہ طول عمر جس میں نہ ہو لطف زندگی

مل جائے مثل خضر تو کیا فائدہ مجھے

دوں تیرا ساتھ عمر رواں کس طریق سے

آنکھیں دکھا رہے ہیں ترے نقش پا مجھے

تخلیق کائنات کو سوچا کیا مگر

کچھ ابتدا ملی نہ صفیؔ انتہا مجھے

paigham-e-zindagi ne diya maut ka mujhe

marne ke intizar mein jina para mujhe

is inqilab ki bhi koi had hai dosto

na ashna samajhte hain ab ashna mujhe

kashti pahunch sakegi ye ta sahil-e-murad

dhoka na de khuda ke liye na khuda mujhe

wo tul-e-umr jis mein na ho lutf-e-zindagi

mil jae misl-e-khizr to kya faida mujhe

dun tera sath umr-e-rawan kis tariq se

ankhen dikha rahe hain tire naqsh-e-pa mujhe

takhliq-e-kainat ko socha kiya magar

kuchh ibtida mili na safi intiha mujhe