Arooz is now on the App Store, for iPhone and iPad. Download →

All poetry

پیری میں کیا جوانی کے موسم کو روئیے

Mir Taqi Mir (1723–1810)

پیری میں کیا جوانی کے موسم کو روئیے

اب صبح ہونے آئی ہے اک دم تو سوئیے

رخسار اس کے ہائے رے جب دیکھتے ہیں ہم

آتا ہے جی میں آنکھوں کو ان میں گڑویئے

اخلاص دل سے چاہیے سجدہ نماز میں

بے فائدہ ہے ورنہ جو یوں وقت کھوئیے

کس طور آنسوؤں میں نہاتے ہیں غم کشاں

اس آب گرم میں تو نہ انگلی ڈبوئیے

مطلب کو تو پہنچتے نہیں اندھے کے سے طور

ہم مارتے پھرے ہیں یو نہیں ٹپے ٹویئے

اب جان جسم خاکی سے تنگ آ گئی بہت

کب تک اس ایک ٹوکری مٹی کو ڈھویئے

آلودہ اس گلی کی جو ہوں خاک سے تو میرؔ

آب حیات سے بھی نہ وے پاؤں دھوئیے