چار دن ہے یہ جوانی نہ بہت جوش میں آ

چار دن ہے یہ جوانی نہ بہت جوش میں آ

اے بت مست مے حسن ذرا ہوش میں آ

دل یہ کہتا ہے جو وہ شمع عذار آ نکلے

بن کے فانوس پکاروں مرے آغوش میں آ

قدم یار کا آوازہ ہر اک گل پر ہے

امن چاہے جو خزاں سے مری پاپوش میں آ

میرے شعروں کے جو مشتاق ہیں فرماتے ہیں

در مضموں صدف لب سے نکل گوش میں آ

بے قرار ایسے ستارے در غلطاں ہو جائیں

آپ جھمکی سے جو فرمائیں نیا گوش میں آ

پیر ہوں بوجھ محبت کا اٹھاؤں کیوں کر

پھر جوانی کو پکاروں کہ برو دوش میں آ

بسر پیر مغاں روح تو ہی ہی اے روح

جلد شیشے سے نکل جسم قدح نوش میں آ

بیٹھ کر یار کے پہلو میں جو اٹھتا ہوں کبھی

پاۓ خوابیدہ یہ کہتا ہے مجھے ہوش میں آ

روز بد ایک نہ اک دن تجھے ننگیا لے گا

اے زری پوش ہم احباب نمد پوش میں آ

داغ ہو جائے گا یہ تاج زری کا اے شمع

جی جلانے کو نہ خوبان زری پوش میں آ

نعمت غیب سے کہتی ہے مہوس کی ہوا

اڑ کے جوہر کی طرح دیگ سے سرپوش میں آ

داغ ہیں ایک کے پر کالے بھڑک اٹھیں گے

دیکھ او فصل بہاری نہ بہت جوش میں آ

نقل محفل نظر آتا نہیں کوئی ہم میں

شیخ مسجد سے نکل بزم نے و نوش میں آ

وصل میں فصل نہ باقی رہے اے جان جہاں

جیسے پہلو میں ہے دل یوں مرے آغوش میں آ

ہاتھ آئے گا مقرر وہ غزال وحشی

بحرؔ چرتی ہے کہاں عقل ذرا ہوش میں آ

char din hai ye jawani na bahut josh mein a

ai but mast-e-mai husn zara hosh mein a

dil ye kahta hai jo wo sham-e-izar a nikle

ban ke fanus pukarun mire aghosh mein a

qadam yar ka awaza har ik gul par hai

amn chahe jo khizan se miri paposh mein a

mere sheron ke jo mushtaq hain farmate hain

dar mazmun sadaf lab se nikal gosh mein a

be qarar aise sitare dar-e-ghaltan ho jaen

ap jhamki se jo farmaen naya gosh mein a

pir hun bojh mohabbat ka uthaun kyun kar

phir jawani ko pukarun ke baro dosh mein a

basar-e-pir-e-mughan ruh tu hi hi ai ruh

jald shishe se nikal jism qadah nosh mein a

baith kar yar ke pahlu mein jo uthta hun kabhi

pae khwabida ye kahta hai mujhe hosh mein a

roz-e-bad ek na ik din tujhe nangya lega

ai zari posh ham ahbab namad posh mein a

dagh ho jaega ye taj zari ka ai shama

ji jalane ko na khuban zari posh mein a

nemat ghaib se kahti hai mahos ki hawa

ur ke jauhar ki tarah deg se sarposh mein a

dagh hain ek ke par kale bharak uthenge

dekh o fasl-e-bahari na bahut josh mein a

naql-e-mahfil nazar ata nahin koi ham mein

shaikh masjid se nikal bazm ne-o-nosh mein a

wasl mein fasl na baqi rahe ai jan-e-jahan

jaise pahlu mein hai dil yun mire aghosh mein a

hath aega muqarrar wo ghazal-e-wahshi

bahr-e-charti hai kahan aql zara hosh mein a