پیدا شعاع مہر کی مقراض جب ہوئی

پیدا شعاع مہر کی مقراض جب ہوئی

پنہاں درازیٔ پر طاؤس شب ہوئی

اور قطع زلف لیلی زہرہ لقب ہوئی

مجنوں صفت قبائے سحر چاک سب ہوئی

فکر رفو تھی چرخ ہنر مند کے لیے

دن چار ٹکڑے ہوگیا پیوند کے لیے

فرہاد مہر نے یہ کیا طور اختیار

اس کوہ بے ستوں فلک پر لیا قرار

تیشہ لگا کے خط شعاعی کا آب دار

کی جوے ٔشیر صبح سیاہی سے آشکار

لیکن عجیب حال تھا بے شیر شاہ کا

نہر لبن میں شور تھا وا اصغراہ کا

یوسف غریق چاہ سیہ ناگہاں ہوا

یعنی غروب ماہ تجلی نشاں ہوا

یونس دہان ماہیٔ شب سے عیاں ہوا

یعنی طلوع نیر مشرق ستاں ہوا

فرعون شب سے معرکہ آرا تھا آفتاب

دن تھا کلیم اور ید بیضا تھا آفتاب

تھی صبح یا فلک کا وہ جیب دریدہ تھا

یا چہرہ مسیح کا رنگ پریدہ تھا

خورشید تھا کہ عرش کا اشک چکیدہ تھا

یا فاطمہ کا نالۂ گردوں رسیدہ تھا

کہیے نہ مہر صبح کے سینے پہ داغ تھا

امید اہل بیت کا گھر بے چراغ تھا

روز سفید یوسف آفاق شب نقاب

مغرب کی چاہ میں تھا جو پا بند اضطراب

سقائے آسماں نے لیا دلو آفتاب

جس میں رسن شعاع کی باندھی بہ آب وتاب

یوسف کو دلو مہر میں بٹھلا کے چاہ سے

مشرق میں لایا کھینچ کے مغرب کی راہ سے

نکلا افق سے عابد روشن ضمیر صبح

محراب آسماں ہوئی جلوہ پذیر صبح

کھولا سپیدی نے جو مصلاے ٔپیر صبح

پھر سجدہ گاہ بن گیا مہر منیر صبح

کرتی تھی شب غروب کا سجدہ درود کو

سیارے ہفت عضو بنے تھے سجود کو

ظلمت جہاں جہاں تھی وہاں نور ہوگیا

پھر مشک شب جہان سے کافور ہوگیا

گویا کہ زنگ آئینے سے دور ہوگیا

باطن رسالۂ شب دیجور ہوگیا

کیا پختہ روشنائی تھی قدرت کے خامے میں

مضموں تھا آفتاب کا ذروں کے نامے میں

کھولے ہوا میں طائر زریں نے بال و پر

بیٹھا وہ آ کے چرخ چہارم کے بام پر

دانے ستاروں کے جو پڑے تھے ادھر ادھر

منقار زر میں چن لیے اس نے وہ سر بسر

گرمیٔ حسن مہر سے آب اب گیا

گردوں پہ خشک چشمۂ مہتاب ہوگیا

پر تھا ہماۓ اوج سعادت شکستہ بال

جز اشک آب و دانے کا تھا دیکھنا محال

تھا پیاس سے سکینہ و اصغر کا غیر حال

منہ زرد لب کبود زباں خشک آنکھ لال

وہ دودھ دودھ کہتا تھا رو کر اشارے سے

یہ پانی پانی کہتی تھی زہرا کے پیارے سے

تھے خرمن فلک پہ ابھی دانۂ نجوم

بونے لگا جو تخم ستم ابن سعد شوم

غلے کے بانٹنے کو ندادی علی العموم

مانند مور دانہ زدوں نے کیا ہجوم

جس کا کہ باپ قاسم رزق زمانہ تھا

ہفتم سے کربلا میں وہ بے آب و دانہ تھا

رومال ظالموں نے زمیں پر بچھا دیے

حصے عمر نے سب کے برابر لگا دیے

اور افسروں کو بدرے کے بدرے اٹھا دیے

اور سر بہ مہر صرہ ٔزر بھی دکھا دیے

لب کھولے حیلہ ور کی عدالت کے جوش نے

گندم نمائی آہ کی یوں جو فروش نے

ہاں اے نمک حلالو نہ ہمت کو ہار یو

بھوکے کو بھوکا پیاسے کو پیاسا ہی ماریو

ابن معاویہ کی خلافت سنواریو

سید کے سر کو سینے پہ چڑھ کر اتاریو

اب تو ہے غلہ کل زرو جاگیرو مال ہے

شبیر کو جو ذبح کرو سب حلال ہے

زینب نے رفتہ رفتہ جو یہ شور سن لیا

بے ساختہ حسین کے فاقے پہ رو دیا

جنگل کو رخ کیا کبھی یثرب کو رخ کیا

آواز دی کہاں ہو تم اے فخر انبیا

قربان جاؤں قبر میں اس شب کو سوتے ہو

یا کربلا میں اپنے نواسے کو روتے ہو

نانا یہ کلمہ گو ہمیں ناحق ستاتے ہیں

پیتے ہیں خود ہمیں نہیں پانی پلاتے ہیں

انصاف کے لیے نہیں کیوں آپ آتے ہیں

اتنا تو پوچھیےیوں ہی مہماں بلاتے ہیں

غلہ سپاہ شام میں تقسیم ہوتا ہے

کنبہ تمہارا تیسرے فاقے سے روتا ہے

سجاد پر مکیں تھے امام فلک مکاں

تقسیم غلہ کا جو سنا حال ناگہاں

ارزاں دیا رفیقوں کو وہ غلۂ گراں

جس غلۂ گراں کے تھے نو دانے آسماں

گندم کے بدلے جنت آدم میں گھر دیا

گھر کیسا کائنات کا مختار کردیا

واں غلہ دے کے سب سے مخاطب ہوا عمر

کھالو کہ اب غذانہ ملے گی کئی پہر

اس جنگ میں ہر اس و تردد ہے سر بہ سر

ایماں کا نقص جان کا خوف آبرو کا ڈر

امت سے سامنا ہے امام جلیل کا

کاٹا ہے جس کے باپ نے پر جبر ئیل کا

بڑھ کر عمر سے کہنے لگے بانیٔ ستم

اپنی تو یہ غذا ہے کہ بھوکے رہیں حرم

نوفل پکارا سیر ہیں آب وغذا سے ہم

کھائی ہے آج قتل علم دار کی قسم

چلایا شمر ہم تو اسی وقت کھائیں گے

جب تین دن کے پیاسے کا سرکاٹ لائیں گے

بولا عمر یہ کبر کی باتیں روا نہیں

منہ کا نوالا شیروں کا سر کاٹنا نہیں

دعواے ٔبے سند سے تمہیں کچھ حیا نہیں

دنیا میں بھوکا پیاسا تو کوئی لڑا نہیں

اترے نہ ہوتے تم جو لب نہر چپن سے

پھر دیکھتا میں لڑتے ہو کیوں کر حسین سے

یہ جو کہا عمر نے وہ چپکے چلے گئے

بے عقل نقد جاں کے عوض دین دے گئے

سید کے قصد ذبح پہ سب غلہ لے گئے

اور یاں عمر کے اسپ عراقی کسے گئے

چیدہ کئے عمر نے سلح کار زار کے

خادم لے آئے چرخ سے تیغیں اتار کے

سجنے لگا سلاح و غا پھر وہ پر دغا

بے خود ہوا جو خود سر نحس پر دھرا

بے ماہ و آفتاب کے گویا گہن لگا

یا دار قد پہ کفر کا بخت سیہ چڑھا

اسلام میں جو ڈالے تھے رخنے یزید نے

ان رخنوں کو کیا زرہ تن پلید نے

نیزہ سنان ابن انس کا تھا دست جور

یہ نیزہ اور حسین کا سینہ مقام غور

ترکش بھی تھا دریدہ دہن حرملہ کے طور

گویا سواے تیر نہ اس کی زباں تھی اور

اول خدنگ اس کا چلا شاہ خلق پر

آخر کو تیر خرملہ اصغر کے حلق پر

کثرت پہ فوج کی ہوا نازاں وہ خود پرست

بولا کہ اپنی فتح ہے شبیر کی شکست

پہلے کیا فرات کا ظالم نے بندوبست

بٹھلائے دس ہزار زرہ پوش تیز و دست

دیوار آہنی لب دریا بلند کی

دریا نے بانگ ہائے حسینا بلند کی

گھاٹوں کو روک کر یہ پکارا کہ ہاں سنو

بے آبرو کروں گا نہ مانے گا حکم جو

پانی کا اک قطرہ نہ شاہ زمن کو دو

میت کے غسل کو نہ وضو کو نہ پینے کو

جاں بر نہ تشنگی ہے امام حجاز ہو

خشکی میں غرق آل نبی کا جہاز ہو

چیدہ کیے ہزار جوانان ناخلف

اس عہدے پر کیا انہیں مامور ہر طرف

ساغر بکف رہیں وہ تنک ظرف صف بہ صف

جب العطش کہیں درپاک شہ نجف

پانی ا نھیں دکھا کے یہ بے آبرو بہا ئیں

پانی بہا کے تشنہ لبوں کا لہو بہا یئں

چالیس سو پھر اس نے کماں دار روسیاہ

بٹھلاے چار گوشوں میں گرد خیام شاہ

سادات کے لیے نہ رکھا گوشہ پناہ

روح بتول کہتی تھی رو رو کے آہ آہ

سنتا ہوں آن بان پہ سادات مرتے ہیں

دیکھوں تو مورچے کہاں شبیر کرتے ہیں

جب صبح بے ردای ٔزینب عیاں ہوئی

اور آخری سپاہ خدا میں اذاں ہوئی

ناموس مصطفے میں بپا یہ فغاں ہوئی

بس اب بہار گلشن زہرا خزاں ہوئی

کانپے گا عرش فاطمہ کے شوروشین سے

جس دم وداع ہوئے گی زینب حسین سے

یاں تھا ہجوم غم حرم نیک ذات پر

واں اہل شام نے کیا قبضہ فرات پر

نرغہ کیا عدو نے شہہ خوش صفات پر

ظلمت محیط ہوگئی آب حیات پر

شب کیا گئی نصیب کا کچھ پھیر ہوگیا

ہوتے ہی صبح خیمے میں اندھیر ہوگیا

کیا رو سفید فوج خدا ہے حضور صبح

آئی ہے ان کے عقد عبادت میں حور صبح

رح سے طلوع مہر جبیں سے ظہور صبح

اک سمت ان کا نور ہے اک سمت نور صبح

سرسجدے میں ہے تن ہے قعود و قیام میں

کیا صبح کی بہار ہے فوج امام میں

آواز ارکبو جو ملائک سناتے ہیں

غازی نماز پڑھ کے مصلےٰ اٹھاتے ہیں

تعقیب کی دعا یئں مگر پڑھتے جاتے ہیں

سجدے کو آستانۂ مولا پہ آتے ہیں

در پر رکھے جبینوں کو سب خوش خصال ہیں

ایک آسمان اور بہتر ہلال ہیں

مثل قمر یہ عابد شب زندہ دار ہیں

ماندن مہر متقیٔ روزگار ہیں

شکل فلک رکوع میں لیل و نہار ہیں

مثل زمیں سجود میں یہ خاک سار ہیں

سجدے سے ان کے خاک وظیفے میں رہتی ہے

تسبیح ان کے ہاتھ میں تکبیر کہتی ہے

دیکھو خشوع کو تو لرزتا ہے تن تمام

پوچھو رجوع قلب تو دل ہے سوے امام

کیا زبد ہے ریا سے بری ہیں یہ نیک نام

جس کو نماز کہتے ہیں وہ یہ ہے والسلام

روشن ہے ان کا اوج عبادت جہان پر

سجادے ہیں زمیں پہ نماز آسمان پر

ہے دست بوس ایک کی شمشیر آب دار

در نجف کا سبحہ کسی کے گلے کا ہار

کوئی خیال حور شہادت سے ہم کنار

کوثر پہ آنکھ ایک جری کی پیالہ دار

کہتے ہیں راہ حق میں شرف کی کمی نہیں

اس راہ میں جو خاک نہ ہو آدمی نہیں

سمجھے ہیں نامرادی ٔدنیا کو یہ مراد

غم ان کے دل میں شاد ہے دل ان کا غم میں شاد

ہرعضو میں ہے دل کی طرح سے خدا کی یاد

قرآن پڑھنا ختم ہے ان پر دم جہاد

بازوے ٔجنگ مثل ترازو تلے ہوئے

ہیں زین پر کہ رحل پہ قرآں کھلے ہوئے

لشکر میں ہے یہ اکبر و عباس کا وقار

وہ انجمن میں شمع تو یہ باغ میں بہار

آنکھوں میں وہ نگاہ تو سینوں میں یہ قرار

وہ بازؤں میں زور یہ قبضے میں ذوالفقار

ان دونوں کی یہ فوج خدا میں مثال ہے

در نجف وہ ہے تو یہ حیدر کا لال ہے

وہ چشم ہے پلک میں تو یہ دل ہے سینے میں

حیدر وہ کعبے میں یہ پیمبر مدینے میں

یوسف کنویں میں نوح ہے گویا سفینے میں

آب بقا وہ چشمے میں یہ زر خزینے میں

وہ آب موتیوں میں یہ اک گل ہزاروں میں

خوشبو وہ پھولوں میں یہ تجلی ستاروں میں

ہر صبح مہر و ماہ کی تو کم ہے روشنی

پر دیکھو ان کے عارضوں کی جلوہ افگنی

خورشید وہ جری ہے تو ہے چاند یہ غنی

اک سمت کو ہے دھوپ اور اک سمت چاندنی

پائی نہ اس طرح کی ضیا ماہتاب میں

دیکھی نہ آفتاب نے یہ دھوپ خواب میں

والشمس سے رسول خدا ہیں مراد اب

اس شمس کی شعاع ہے اکبر کے رخ میں سب

عباس کا ہے ماہ نبی ہاشمی لقب

دودر ہیں ان کی مہر و عطا کے یہ روز و شب

ہر صبح و شام روے ٔخلائق پہ باز ہیں

ذرہ نواز وہ ہیں یہ اختر نواز ہیں

عباس سے یہ کہتے ہیں اکبر کہ کیوں چچا

کیا ہوگا گرد خیمہ بھی ہے لشکر جفا

اماں کے پردے کا مجھے اندیشہ ہے بڑا

باندھیں گے اپنا مورچہ ہم بھی پئے و غا

خیمے سے فاصلہ نہ پدر سے جدائی ہو

یہ طور ہو اگر تو بخوبی لڑائی ہو

اماں نے کہہ دیا ہے کہ بخشوں گی میں نہ شیر

اکبر تمہارے ہوتے لگا شاہ پر جو تیر

حافظ رہوں گا باپ کا میں وقت دار و گیر

لیکن غضب ہے اہل حرم ہوں اگر اسیر

خیر اب تو دامن شہ خوش خو نہ چھوڑیں گے

جو ہو سو ہو حسین کا پہلو نہ چھوڑیں گے

عباس کہتے ہیں کہ فدا تم پہ ہو چچا

زینب کے پالنے کی یہ غیرت ہے میں فدا

وہ پوچھتے ہیں آپ کہیں ہے ارادہ کیا

یہ ہاتھ منہ پہ پھیر کے کہتے ہیں دیکھنا

جینے سے ہاتھ دھوتے ہیں مرد اپنی بات پر

اپنا تو آج مورچہ ہوگا فرات پر

کہتے ہیں جھوم جھوم کے زینب کے یادگار

اس حملے میں کمند ہیں اپنے صفوں کے پار

ابن حسن کے حسن بیاں سے ہے آشکار

ارزق کا رزق برق مٹادوں تو ہو قرار

دعوے ہیں آج حیدریوں کو بڑے بڑے

چاہیں تو غرب و شرق کو لے لیں کھڑے کھڑے

کیوں کر نہ شیر ہوں خلف شیر کبریا

سیدانیوں کا دودھ ہے ان پیاسوں نے پیا

دو دن سے گو نصیب میں پانی ہے نے غذا

لیکن وہی ہے چہرے کی سرخی وہی ضیا

سید ہر ایک حال میں خوش حال رہتے ہیں

کھائیں نہ کھائیں شیروں کے منہ لال رہتے ہیں

چہروں سے کیا ضیا و صفا آشکار ہے

شہر حلب انہیں کا اک آئینہ دار ہے

اک بندہ تار زلف کا ملک تتار ہے

یہ باغ رخ بہشت کی فصل بہار ہے

گلو گوں قدوں کے چہرے ہیں کس آب و تاب کے

ہیں پھول کے درخت میں پھل آفتاب کے

ابرو نے کچھ ہلال کا باقی رکھا ہے نام

رخ نے کیا تمام مہ چاردہ کا کام

کس رو سے ان کے رخ کا ہو روکش مہ تمام

دو ہفتے وہ ہے اور یہ ہیں مہرباں مدام

قدرت کے سب لکھے ہوئے یہ خط و خال ہیں

پر نور چہرے مطلع حسن و جمال ہیں

آئینہ روبروۓ جہاں ہے جو خوش نما

وہ ان کا روشناس ہے بس اور وجہ کیا

اب تک انہیں حجابوں کے دھوکے میں بارہا

پھرتا ہے عکس آئینہ کے گھر میں جا بہ جا

پر طاق دل سے آئینہ ہے یہ گرا ہوا

جو آئینے کے عکس کا ہے منہ پھرا ہوا

دنداں بہادروں کے کجا اور در کجا

دو حرف در کے وہ بھی ہیں باہم جدا جدا

دنداں ملے ہوئے ہیں جدائی نہیں ذرا

پاس ادب سے دور ہے گر ان کو در کہا

دنداں گہر ہیں مخزن پروردگار کے

دل شرم سے چھدے ہیں در آب دار کے

رخ چشمۂ حیات احبا کے واسطے

خط لب کا ذوالفقار ہے اعدا کے واسطے

فیض دہان پاک ہے دنیا کے واسطے

یاں جاے دم زدن نہیں عیسیٰ کے واسطے

درج دہن کے دانتوں سے رتبے زیاد ہیں

یہ وہ صدف ہیں جس کے گہر خانہ زاد ہیں

پلکوں کے نیمچوں سے زبردست زیر ہیں

یاں زندگی سے مردم خوں خوار شیر ہیں

صید افگنی پہ چشم کی آہو دلیر ہیں

آنسو نہیں پلک کے نیستاں میں شیر ہیں

غیرت سے آب دیدہ ہر اک شہ سوار ہے

تیغ اک نظر سناں مژہ ٔ آب دار ہے

باندھے کمر جہاد پہ خود لیس ہے کماں

غصے سے ایک پوست ہے بالاے استخواں

اس قوس کی ہے قوس قزح دل سے مدح خواں

نیزے سے نیزہ باز فلک طالب اماں

اس نیزے سے مباحثے کی کس کو تاب ہے

گویا زباں کی طرح سے حاضر جواب ہے

ڈھال ان کی ہے وہ بدر کی صورت دم جدال

اس بدر سے تراشے ہیں تیغوں کے سو ہلال

پر ہے جہاد میں یہ وہی بدر بے زوال

حقا کہ حق پہ ہیں یہ قریشی ٔخوش خصال

پس ان کے دوش پر یہ سپر کی دلیل ہے

پشت و پناہ کعبہ رب الجلیل ہے

ناگاہ خیمہ گاہ سے شور بکا اٹھا

سجادے سے نمازیٔ خیر النسا اٹھا

اور سبز پردۂ در آل عبا اٹھا

آواز آئی بانو کی وارث مرا اٹھا

راضی سکینہ اپنی یتیمی پہ ہوگئیں

پچھلے سے جاگتی رہیں اس وقت سوگئیں

کلثوم صبر کر چکیں مظلوم بھائی کو

زینب نے بھی لٹا دیا ماں کی کمائی کو

بانو نے بھی قبول کیا بے ردائی کو

اب کون رو کے ہائے شہہ کربلائی کو

عابد نے کہہ دیا کہ رہ کر دگار میں

ہم تازیانے کھائیں گے بابا بخار میں

خدام تازیٔ شہ والا کو در پہ لائے

مولاۓ حلہ پوش کفن پہنے باہر آئے

اور جسم سے رکاب نےدونوں قدم لگائے

زینب پکاری ہائے حسین غریب ہائے

میکال روئے روح امیں نالہ کش ہوئے

سامان موت پر ملک الموت غش ہوئے

جنگاہ میں صفیں جو بندھیں فوج شام کی

ہر تیغ زن کو فکر ہوئی ننگ و نام کی

خیمے کے در پہ آئی سواری امام کی

مسند الٹ دی موت نے خیرالانام کی

تاریک چشم اہل حرم میں جہاں ہوا

زہرا کا چاند لے کے ستارے رواں ہوا

گردوں نشیں سواریٔ شہ کا غبار تھا

اک ایک ذرہ اس کا ثریا وقار تھا

شہ مہر زیں تھے شیر زیاں راہ دار تھا

زہرا کا آفتاب اسد پر سوار تھا

حلقے کیے تھے سب رفقا اس جناب کے

یا چودہویں کے چاند تھے گرد آفتاب کے

قبروں کے واسطے جو خریدی تھی کچھ زمیں

ٹھہری وہاں سواریٔ شاہ فلک نشیں

لشکر کو اپنے دیکھ کے بولے امام دیں

لے کر بلا خدا نے دیے تجھ کو یہ مکیں

سب شیر حق کے لال ہیں زہرا کے پیارے ہیں

در نجف ہیں عرش معلا کے تارے ہیں

کہتے تھے کربلا سے یہ سلطان کربلا

جومثل سیل خیل جفا قہر سے بڑھا

صف باندھنے لگا پسر سعد بے حیا

مختار اس نے میمنہ کا شیث کو کیا

چن چن کے نیزہ دار بھی چالیس سود یے

رہ وار گرم رو دیے ملبوس نو دیے

ازرق کو تیر زن دیے پنجاہ صد جدا

کی اس نے زیب میسرہ ٔلشکر جفا

اور دے کے دس ہزار جو انان پر دغا

سونپا جناح حنظلہ کو اس نے برملا

مل کر گلے نبی و علی رن میں روتے تھے

اک سر کے کاٹنے کے یہ سامان ہوتے تھے

صف باندھ کر پسر سے مخاطب ہوا عمر

اکبر امام زادے ہیں تو ہے مرا جگر

اپنا حشم دکھا انہیں پھر کر ادھر ادھر

سرداروں کو پکارا کہ ہاں صاحب ہنر

فوج خدا کے سامنے جاؤ رجز پڑھو

گھوڑے اٹھاؤ نیزے ہلاؤ رجز پڑھو

چلہ دکھایا حرملہ نے بڑھ کے تیر کا

یاد آیا شہ کو دودھ اگلنا صغیر کا

چمکا جو بھالا ہلنے میں ابن نمیر کا

مرقد بلا نجف میں جناب امیر کا

دل پکڑے آئے احمد مرسل مدینے سے

لپٹا لیا حسین نے اکبر کو سینے سے

چمکا کے تیغ شمر بڑھا فوج شام سے

بولا ملا کے آنکھ سپاہ امام سے

کس قدر بغض ہے اسے پیاسے کے نام سے

نکلا ہی پڑتا ہے مرا خنجر نیام سے

سادات پر نہ رحم کروں نے کرم کروں

گر پانچ حلق ہوں تو برابر قلم کروں

ناگہ رواں ہوا پسر سعد کا پسر

ہم سن رفیق ویار جلو میں ادھر ادھر

ہاتھوں پہ خادم آگے لیے تیغ اور سپر

اور اک غلام کھولے ہوئے سر پہ چتر زر

یوں رد ہوا وہ اکبر ذی شاں کے سامنے

فرعون جیسے موسیٔ عمراں کے سامنے

مل کر حسینیوں نے کہا اے شہ امم

اب کب تلک سکوت کہ رکتا ہے اپنا دم

قرنا بجایا چاہتے ہیں بانیٔ ستم

یاں صف کشی نہ مورچہ نے طلب نہ علم

اب ضبط اے وزیر یداللہ قہر ہے

شیروں کے منہ پہ چڑھتے ہیں روباہ قہر ہے

شہ بولے کیا ارادہ کریں صف کشی کا ہم

واں کثرت سپہ ہے علم ہیں کئی علم

یاں دوست کیا عزیز بھی کم زندگی بھی کم

مظلوم کھائیں گے مری مظلومی کی قسم

ہر سال اس مہینے میں سب خاک اڑائیں گے

اس روز تعزیہ مرا مومن اٹھائیں گے

آئی ندا یہ عرش سے اے حامل بلا

اس سمت زر کے بندے ہیں تیری طرف خدا

ہاں جلد اب منگا علم فوج کبریا

باندھے پرا کھڑے ہیں زیارت کو انبیا

کس بیرق و نشاں نے بزرگی یہ پائی ہے

تیرے علم کے سائے میں میری خدائی ہے

عباس نام ور کو پکارے شہ امم

ہاں اے نشان شیر خدا لاؤ تو علم

خاطر نشاں رکھو یہ نشاں دیں گے تم کو ہم

عباس حکم شہ سے چلے جانب حرم

پہنچے جو خیمۂ شہ عالی وقار میں

دیکھا کھڑا ہوا ہے علم انتظار میں

زینب نے دیکھ کر رخ عباس ذی حشم

خود اپنے چھوٹے بھائی کو اٹھ کر دیا علم

کی سات بار ناد علی بازؤں پہ دم

سرکو جھکا کے چوم لیے شیر نے قدم

طور آگیا پسند جو حق کے فدائی کا

زینب نے سر لگا لیا سینے سے بھائی کا

عباس لے کے رایت شاہ امم چلے

کس شان سے علی کا اٹھاکر علم چلے

گویا لیے قبالہ ٔباغ ارم چلے

پٹکا علم کا تھام کے اہل حرم چلے

زینب پکاری شاہ نجف یاد آتے ہیں

کس شان سے نشاں لیے عباس جاتے ہیں

یارب نشان والے کا نام و نشاں رہے

یہ شمس بے زوال یہ گل بے خزاں رہے

لشکر رہے حسین رہیں یہ نشاں رہے

اس حامل علم پہ علی کی اماں رہے

روشن رہے قمر شہ بدر و حنین کا

وہ خاک میں ملے جو ہو دشمن حسین کا

اس شان سے بڑھا علم اقدس ر سول

سب انبیا جلو میں رواں بادل ملول

کرو بیان عرش کا ہر اک قدم نزول

سرننگے ساتھ حوروں کے زیر علم بتول

اک سمت سبز پوش جواں روتے آتے تھے

حامل پہ ہر قدم پہ فدا ہوتے آتے تھے

عباس شہ کے پاس جو پہنچے علم لیے

اقبال آیا پشت پہ جاہ و حشم لیے

شانوں کے بوسے شہ نے بہ لطف و کرم لیے

عباس نام دار نے جھک کر قدم لیے

کی عرض مجھ کو سب میں نمودار کر دیا

بے بال و پر کو جعفر طیار کر دیا

ناگاہ فضہ دوڑی ہوئی آئی ہے بے حواس

کچھ شہ کے کان میں کہا اور پھر گئی اداس

زہرا کے لال کو ہوئی تشویش بے قیاس

اصحاب پوچھنے لگے آ آ کے پاس پاس

نامحرموں میں کہنے کو کیا فضہ آئی تھی

بولے پیام زینب بے کس کا لائی تھی

عباس ہاتھ باندھ کے بولے کہ یا امام

میرے علم اٹھانے میں تو کچھ نہیں کلام

عون و محمدان کے پسر ہیں میں ہوں غلام

شہ نے کہا نہیں مجھے بھیجا ہے یہ پیام

مالک ہو چاہو جیسا جو رتبہ ہو دیجیو

سردار فوج کا مرے اکبر کو کیجیو

سب نے کہا یہی ہے ہمارا بھی مدعا

اکبر پہ سر نثار ہے جان آپ پر فدا

بیٹا وہاں عمر کا ہے سالار فوج کا

سردار ہوں ہمارے بھی ہم شکل مصطفی

گو وہ پسر کو لاکھ جواہر پنہائے گا

نقشہ کہاں سے احمد مرسل کا لائے گا

پھر شہ نےکی درست صف لشکر خدا

روئے زمیں ہوا صف لشکر سے خوش نما

بینی سے حسن چہرے کا ہو جس طرح سوا

روے زمیں فقط نظر آتا تھا دائما

آراستہ جو رن میں صف فوج دیں ہوئی

سیدھی نمود بینی روئے زمیں ہوئی

اپنے حبیب خاص کو تو میمنہ دیا

اور میسرہ زہیر کو شہ نے عطا کیا

بخشی جناح قلب کو اطفال سے ضیا

اکبر سے پوچھا کیوں جگر شیر کبریا

اس لشکر قلیل کے مختار ہوتے ہو

اک دوپہر کے واسطے سالار ہوتے ہو

وہ بولے دوپہر کا کسے انتظار ہے

گر آپ حکم دیں ابھی بندہ نثار ہے

شہ نے کہا یقیں مجھے اے گل عذار ہے

تیرا جوانا مرگ لقب آشکار ہے

سالار اسے کیا جوشہ عرش اوج نے

دکھلائی نذر ہاتھوں پہ سر رکھ کے فوج نے

خیموں میں دختران علی ہول کھاتی تھیں

پردہ اٹھا کے وارثوں کو دیکھ جاتی تھیں

بہر دعا مصلا برابر بچھاتی تھیں

گہ عالم ہر اس میں زیور بڑھاتی تھیں

باجے کے غل سے بچوں کو دہشت جو ہوتی تھی

اصغر کے دل پہ ہاتھ رکھے بانو روتی تھی

زینب سر اپنا پیٹ کے کرتی تھی یہ کلام

ہے ہے بچے گی کاہے کو جان شہ انام

فوجوں کا یاں سے تا در کوفہ ہے اژدہام

قاصد بلاؤ نامہ لکھو اور یہ دو پیام

گھیرا ہے سب نے فاطمہ کے نورعین کو

آؤ مدینے والو بچاؤ حسین کو

چلاتی تھیں یہ روکے کہ اماں دہائی ہے

بی بی ترے قمر پہ گھٹا آج چھائی ہے

ظلم و جفا کے نرغے میں زینب کا بھائی ہے

بابا بچائیے دم مشکل کشائی ہے

گاہے پکارتی تھی رسالت مآب کو

نانا گہن لگا ہے ترے آفتاب کو

نازاں تھا صبر صبر شہ حق شناس پر

قرباں تھا ہوش ابن علی کے حواس پر

دریا کا زہرہ آب تھا سید کی پیاس پر

مایوسی آس پاس تھی مرنے کی آس پر

ماں رن میں اور خیمے میں ماں جائی روتی تھی

تنہائی پر حسین کی تنہائی روتی تھی

اس وقت آئے شمر و عمر روبروے شاہ

بولے سپاہ کیا ہوئی اے شام کم سپاہ

کیوں ہم ہوئے تباہ کہ حضرت ہوئےتباہ

اس لشکر قلیل پہ تھا افتخار واہ

کیا رہ گیا کہ جس پہ یہ کچھ آن بان ہے

بیعت کریں جو آپ تو اب بھی امان ہے

لاحول پڑ ھ کے کہنے لگے سرور ہدا

گو اب وہ فوج ہے نہ علم دار با وفا

اس بے کسی میں بھی وہی ہے حوصلہ مرا

بیعت کبھی کروں گا نہ میں لاکھ ہو جفا

واللہ ہاتھ دو گا نہ فاسق کے ہات میں

سرجائے گا پہ فرق نہ آئے گا بات میں

ظالم پکارا سر نہ کٹاؤ تو کیا کرو

اب اختیار کیا جو طلب خوں بہا کرو

تیغ دوسر کو میان سے لو سامنا کرو

دو دن کی بھوک پیاس میں کیوںکرو دغا کرو

ہو بھی کلائیوں میں جو دست خدا کا زور

کیوں کر دکھاؤ گے اسد کبریاں کا زور

شہ بولے تم سمجھتے ہو ناچار ہے حسین

سبط نبی ہے خلق کا مختار ہے حسین

کرار ابن حیدر کرار ہے حسین

قہرو جلال خالق غفار ہے حسین

ساحل پہ آ کے خون کا دریا بہاتا ہوں

اک فاقہ کش کے دودھ کی طاقت دکھاتا ہوں

آگے بڑھے جو شہ تو وہ مکارہٹ گئے

اپنی جگہ پہ اہل ضلالت پلٹ گئے

الٹی جو آستین دو عالم الٹ گئے

رکھا جو ہاتھ قبضے پہ دل سب کے پھٹ گئے

شورش ہوئی زمان پہ برنا و ٔپیر کی

کھنچتی ہے ذوالفقار جناب امیر کی

باہر نیام سے سر تیغ رواں ہوا

یا آستین سے ید بیضا عیاں ہوا

اژ در نکل کے غار سے شعلہ فشاں ہوا

بے پردہ مہر خسرو کون و مکاں ہوا

جوہر نہیں وہ تیغ شہ خوش خصال میں

دیکھو چمک رہے ہیں ستارے ہلال میں

کھنچتے ہی ذوالفقار نے حضرت کو دی صدا

اے رہنما کشندۂ اصغر کو تو بتا

ہے کس پرے میں قاتل ہم شکل مصطفا

دریا پہ ہوگا نوفل مکار و بے حیا

کوئی حسینیوں کا کشندہ نہ چھوڑوں گی

میں شمر و ابن سعد کو زندہ نہ چھوڑوں گی

دامن کو ذوالفقار سنبھالے ہوئے چلی

سانچے میں پھل کے فتح کو ڈھالے ہوئے چلی

جوہر کی انکھڑیوں کو نکالے ہوئے چلی

نالوں کی زلف دوش پر ڈالے ہوئے چلی

کھنچ کر چلی یہ چال نئی اشقیا کے ساتھ

ہفتاد ہاتھ بڑھ گئی ناز و دا ادا کے ساتھ

سیفی چلی کہ سیف ید اللہ رواں ہوئی

تیغ نگہ نیام فلک میں نہاں ہوئی

صوفی کی طرح چلہ نشیں ہر کماں ہوئی

ہستی فنا ہوئی تو اماں بے اماں ہوئی

زیر فلک تڑپنے سے اس شعلہ بار کے

بجلی کے سر پہ رعد گرا چیخ مار کے

آنکھیں زرہ کی تیغ پہ گرویدہ ہوگئیں

مانندکاہ برچھیاں کاہیدہ ہوگئیں

سہمیں کمانیں دوش پہ چسپیدہ ہوگئیں

تیغیں سمٹ کے قبضوں میں پوشیدہ ہوگئیں

حربے تو ہاتھ سے گرے ہاتھ آستین سے

سر تن سے پاؤں رن سے رن اٹھا زمین سے

وہ تیغ یوں چمک کے سوے راس چپ گئی

کوڑا لگایا رعد نےبجلی تڑپ گئی

بن کر سپاہ کے لیے لرزے کی تپ گئی

دوزح کے شعلوں کی کفنی تن پہ نپ گئی

دل ناریوں کا تپ کی حرارت سے جل گیا

کچھ کچھ بخار تیغ کے دل کا نکل گیا

ناز وادا سے لیلی فتح و ظفر چلی

مجنوں ہزاروں ہوگئے اس کے جدھر چلی

فوج عدو میں موت کی بن کر خبر چلی

مغرور خود سروں پہ جو تیغ دو سرچلی

شفاف و صاف جنگ کا میدان کردیا

توڑے پرے صفوں کو پریشان کردیا

یہ کلک تیغ فرد سپر پر جو چل گیا

ہوکر نڈھال ڈھال کا چہرہ بدل گیا

فوراً سپر میں ڈوب کے باہر یہ پھل گیا

گویا گہن میں آکے مہ نو نکل گیا

تن غرب تھا نہ شرق تھا اہل جدال کا

پر اس پہ تھا طلوع و غروب اس ہلال کا

ابرو کی شکل تھی خم شمشیر سے عیاں

چلتے ہی رن میں بندھ گیا بھونچال کا سماں

یوں جسم رعشہ دار سے روحیں ہوئیں رواں

جس طرح بھاگیں زلزلے میں چھوڑ کر مکاں

پیش نگاہ موت تھی تیغ دوسر نہ تھی

کچھ تن بدن کی خیبریوں کو خبر نہ تھی

آب دم حسام سے برسات ہوگئی

ایسی جھڑی لگی کہ گھٹا مات ہوگئی

ٹاپوں کی راہ کوچۂ ظلمات ہوگئی

رنگ سپاہ شام اڑا رات ہوگئی

تھا شور دھوپ دیکھنے کو سب ترستے ہیں

چھایا ہے ابر تیغ علی سر برستے ہیں

شہباز تیغ نے سپروں کو اڑا دیا

چن چن کے افسروں کے سروں کو اڑا دیا

خنجر قلم کیے تبروں کو اڑا دیا

پسپا کیا سروں کو پروں کو اڑا دیا

برش کی یہ بندھی تھی ہوا رزم گاہ میں

ہر سمت خاک اڑاتی تھی جنگی سپاہ میں

ظلمت میں آنے جانے کو آب حیات تھی

اور روشنی میں نیر اعظم کی ذات تھی

اندھیر کرنے کو یہ قیامت کی رات تھی

منہ سے نکلنا اس کے لیے ایک بات تھی

رن میں تو کافروں کے فقط حلق پر پھری

پر شہروں میں زبانوں پہ مثل خبر پھری

آخر پکارے سب کہ پیمبر کا واسطہ

اے تیغ نوجوانی اکبر کا واسطہ

اے تیغ روح فاتح خیبر کا واسطہ

اے تیغ خوردسالی اصغر کا واسطہ

کوفے کی یا کہ شام کے جانے کی راہ دے

پہنچے سزا کو اپنی ہمیں تو پناہ دے

قبضے کو چوم کر یہ پکارے شہ زمن

بس ذوالفقار بس کہ لرزتے ہیں سب کے تن

شمشیر نے جواب دیا ہو کے نعرہ زن

پہلے ہی کہہ چکی ہوں یہ حضرت سے میں سخن

لاشوں سے شام و کوفہ کے میداں بھروں گی میں

دم لوں گی جب کہ شمر کو بے دم کروں گی میں

اے ذوالفقار بس شدنی یہ نہیں ہے آہ

تو اس کا سر نہ کاٹ سکے گی خدا گواہ

شبیر کا گلا وہی کاٹے گا بے گناہ

خنجر ہے اس کا اور پیمبر کی بوسہ گاہ

جانے دے قتل شمر سے کیا تجھ کو کام ہے

اے تیغ یہ حسین کے قاتل کا نام ہے

روتی ہوئی وہ تیغ درآ ئی نیام میں

اور شاہ بے بپاہ گھرے فوج شام میں

آئے ملک فلک سے رکاب امام میں

ہر اک یہ نوحہ کرتا تھا اس اژدھام میں

یا شیر کر دگار بچا لو حسین کو

دامن میں اپنے آ کے چھپالو حسین کو

خاک شفا سروں پہ اڑاتے چلے ملک

خون جگر سے سبحۂ یاقوت تھی پلک

پہنچے تھے تا فلک کہ لرزنے لگے فلک

اور یہ فغاں زمیں سے گئی آسماں تلک

فریاد گوشوارۂ عرش خدا گرا

لو خاک پر ستارۂ خیر النسا گرا

گرتے ہی خاک پر شہ دیں کو غش آگیا

پھر بھی نہ کوئی پیاسے کو پانی پلا گیا

خنجر لگا گیا کوئی نیرہ لگا گیا

کھولی جو آنکھ شہ نے ہر اک تھر تھرا گیا

دشمن بھی کہہ اٹھے یہ پیمبر کا پھول ہے

آنکھوں میں صاف گردش چشم رسول ہے

پر آہ آہ شمر نے بڑھ کر غضب کیا

سینے پہ موزہ حلق پہ خنجر کو رکھ دیا

آئے لحد کو چھوڑ کے محبوب کبریا

دوڑے نجف سے روتے ہوئے شاہ اوصیا

زہرا پکاری یہ دل مضطر کا چین ہے

میرا حسین ہے ارے میرا حسین ہے

اے شمر مصطفی کی رسالت کا واسطہ

اے شمر مرتضی کی امامت کا واسطہ

اے شمر اہل بیت کی حرمت کا واسطہ

اے شمر کبریا کی عدالت کا واسطہ

صدقہ نبی کی روح کا حیدر کے صبر کا

تو گل نہ کر چراغ پیمبر کی قبر کا

چلائی در سے زینب بے کس بھی وا اخا

اماں تو آئیں میں بھی نکل آؤں ننگے پا

بولی سکینہ روک لوں میں خنجر جفا

باقر پکار ا اروکے میں سوجان سے فدا

شاید یہ تیغ تھام لے معصوم جان کر

دادا ترے گلے پہ گلا رکھ دوں آن کر

پھر مڑ کے زیر تیغ یہ بولے شہ امم

زینب تجھے شہادت شبیر کی قسم

بٹھلا مرے یتیموں کو خیمے میں ایک دم

بٹتا ہے دھیان محو جمال خدا ہیں ہم

بچوں کو لے کے دیوڑھی سے زینب تو ہٹ گئی

یاں بوسہ گاہ احمد مختار کٹ گئی

برپا ہوا حرم میں قیامت کا شوروشین

نہ سینوں میں قرار رہا نہ دلوں میں چین

سن سن کے قتل گاہ میں خیرالنسا کے بین

زینب پکاری بی بیو مارے گئے حسین

تھا وقت عصر بھائی سے زینب جو چھٹ گئی

مغرب تلک حسین کی سرکار لٹ گئی

بس اے دبیرؔ دھوم ہے اس شوروشین کی

لٹتی ہے بارگاہ شہ مشرقین کی

زینب کے آگے جلتی تھی مسند حسین کی

ہلتی تھی قبر فاتح بدر و حنین کی

خالق سے کہہ کہ بخش در مدعا مجھے

حضرت کی کربلا کا مرقع دکھا مجھے

paida shua-e-mehr ki miqraz jab hui

pinhan darazi-e-pur-e-taus shab hui

aur qat-e-zulf-e-laila-e-zohra laqab hui

majnun sifat qaba-e-sahar chak sab hui

fikr-e-rafu thi charkh-e-hunar mand ke liye

din char tukre hogaya paiwand ke liye

farhad mehr ne ye kiya tur ikhtiyar

is koh-e-be sutun falak par liya qarar

tesha laga ke khat shuai ka ab dar

ki juwe sher subh siyahi se ashkar

lekin ajib hal tha be sher shah ka

nahr-e-laban mein shor tha wa asghara ka

yusuf ghariq-e-chah-e-siyah nagahan hua

yaani ghurub-e-mah tajalli nishan hua

yunas dahan-e-mahi-e-shab se ayan hua

yaani tulu-e-nayar-e-mashriq sitan hua

firaun shab se marka ara tha aftab

din tha kalim aur yad-e-baiza tha aftab

thi subh ya falak ka wo jeb-e-darida tha

ya chehra masih ka rang-e-parida tha

khurshid tha ke arsh ka ashk-e-chukida tha

ya fatima ka nala-e-gardun rasida tha

kahiye na mehr subh ke sine pe dagh tha

ummid ahl-e-bit ka ghar be charagh tha

roz-e-safed yusuf-e-afaq shab naqab

maghrib ki chah mein tha jo pa band-e-iztirab

saqqa-e-asman ne liya dalo aftab

jis mein rasan shua ki bandhi ba ab watab

yusuf ko dalo mehr mein bithla ke chah se

mashriq mein laya khinch ke maghrib ki rah se

nikla ufuq se abid-e-raushan zamir-e-subh

mehrab-e-asman hui jalwa pazir-e-subh

khola sapedi ne jo musalla-e-pir-e-subh

phir sajda gah ban gaya mehr-e-munir subh

karti thi shab ghurub ka sajda durud ko

sayyare haft uzw bane the sujud ko

zulmat jahan jahan thi wahan nur-e-hogaya

phir mushk shab jahan se kafur hogaya

goya ke zang aine se dur hogaya

batin risala-e-shab-e-dijaur hogaya

kya pukhta raushnai thi qudrat ke khame mein

mazmun tha aftab ka zarron ke name mein

khole hawa mein tair-e-zarrin ne bal-o-par

baitha wo a ke charkh chaharum ke bam par

dane sitaron ke jo pare the idhar idhar

minqar-e-zar mein chun liye us ne wo sar basar

garmi-e-husn-e-mehr se ab ab gaya

gardun pe khushk chashma-e-mahtab hogaya

par tha huma-e-auj-e-saadat shikasta bal

juz ashk ab-o-dane ka tha dekhna muhal

tha pyas se sakina-o-asghar ka ghair hal

munh zard lab kabud zaban khushk ankh lal

wo dudh dudh kahta tha ro kar ishare se

ye pani pani kahti thi zahra ke pyare se

the khirman-e-falak pe abhi dana-e-nujum

bone laga jo tukhm-e-sitam ibn-e-saad shum

ghalle ke bantne ko nidadi ali alumum

manind-e-mor dana zadon ne kiya hujum

jis ka ke bap qasim rizq-e-zamana tha

haftam se karbala mein wo be ab-o-dana tha

rumal zalimon ne zamin par bichha diye

hisse umar ne sab ke barabar laga diye

aur afsaron ko badre ke badre utha diye

aur sar ba mehr surra zar bhi dikha diye

lab khole hila war ki adalat ke josh ne

gandum numai ah ki yun jo farosh ne

han ai namak halalo na himmat ko har yu

bhuke ko bhuka pyase ko pyasa hi mariyo

ibn-e-maanoye ki khilafat sanwariyo

sayyad ke sar ko sine pe charh kar utariyo

ab to hai ghalla kal zaro jagiro mal hai

shabbir ko jo zabh karo sab halal hai

zinib ne rafta rafta jo ye shor sun liya

be sakhta hasin ke faqe pe ro diya

jangal ko rukh kiya kabhi yasrab ko rukh kiya

awaz di kahan ho tum ai fakhr-e-ambiya

qurban jaun qabr mein is shab ko sote ho

ya karbala main apne nawase ko rote ho

nana ye kalima go hamen nahaq satate hain

pite hain khud hamen nahin pani pilate hain

insaf ke liye nahin kyun ap ate hain

itna to puchhiyeyun hi mehman bulate hain

ghalla sipah-e-sham mein taqsim hota hai

kumba tumhara tisre faqe se rota hai

sajjad par makin the imam-e-falak makan

taqsim ghalla ka jo suna hal-e-nagahan

arzan diya rafiqon ko wo ghalla-e-giran

jis ghalla-e-giran ke the nau dane asman

gandum ke badle jannat-e-adam mein ghar diya

ghar kaisa kainat ka mukhtar kardiya

wan ghalla de ke sab se mukhatib hua umar

khalo ke ab ghizana milegi kai pahar

is jang mein har is-o-taraddud hai sar ba sar

iman ka naqs jan ka khauf abru ka dar

ummat se samna hai imam-e-jalil ka

kata hai jis ke bap ne par jabr il ka

barh kar umar se kahne lage bani-e-sitam

apni to ye ghiza hai ke bhuke rahen haram

naufal pukara sair hain ab waghza se ham

khai hai aj qatl-e-alam dar ki qasam

chillaya shimr ham to isi waqt khaenge

jab tin din ke pyase ka sarkat laenge

bola umar ye kibr ki baten rawa nahin

munh ka nauilla sheron ka sar katna nahin

daawae be sanad se tumhen kuchh haya nahin

duniya mein bhuka pyasa to koi lara nahin

utre na hote tum jo lab-e-nahr chappan se

phir dekhta main larte ho kyun kar hasin se

ye jo kaha umar ne wo chupke chale gae

be aql naqd-e-jan ke ewaz din de gae

sayyad ke qasd zabh pe sab ghalla le gae

aur yan umar ke asp iraqi kise gae

chida kiye umar ne silah kar zar ke

khadim le ae charkh se teghen utar ke

sajne laga silah-o-gha phir wo par dagha

be khud hua jo khud sar nahs par dhara

be mah-o-aftab ke goya gahan laga

ya dar qad pe kufr ka bakht-e-siyah charha

islam mein jo dale the rakhne yazid ne

in rakhnon ko kiya zira tan-e-palid ne

neza sinan ibn-e-uns ka tha dast-e-jaur

ye neza aur hasin ka sina maqam-e-ghaur

tarkash bhi tha darida dahan haramlahu ke tur

goya soai tir na us ki zaban thi aur

awwal khadang us ka chala shah khalq par

akhir ko tir khurramlahu asghar ke halq par

kasrat pe fauj ki hawa nazan wo khud parast

bola ke apni fath hai shabbir ki shikast

pahle kiya furat ka zalim ne bandobast

bithlae das hazar zira posh tez-o-dast

diwar ahani lab-e-dariya buland ki

dariya ne bang ha-e-hasina buland ki

ghaton ko rok kar ye pukara ke han suno

be abru karunga na manega hukm jo

pani ka ik qatra na shah-e-zaman ko do

mayyat ke ghusl ko na wuzu ko na pine ko

jan bar na tishnagi hai imam-e-hijaz ho

khushki mein gharq-e-al-e-nabi ka jahaz ho

chida kiye hazar jawanan-e-nakhalaf

is ohde par kiya unhen mamur har taraf

saghar bakaf rahen wo tunuk zarf-e-saf ba saf

jab alatash kahin darpak shah-e-najaf

pani a nhen dikha ke ye be abru baha en

pani baha ke tishna labon ka lahu baha yin

chalis so phir us ne kaman dar-e-rusiyah

batthalai char goshon mein gard khayyam shah

sadat ke liye na rakha gosha panah

ruh-e-batul kahti thi ro ro ke ah ah

sunta hun an-e-ban pe sadat marte hain

dekhun to morche kahan shabbir karte hain

jab subh be radi zinib ayan hui

aur akhiri sipah-e-khuda mein azan hui

namus-e-mustafae mein bapa ye fughan hui

bas ab bahar-e-gulshan-e-zahra khizan hui

kanpega arsh fatima ke shoroshain se

jis dam-e-wida hue gi zinib hasin se

yan tha hujum-e-gham-e-haram nek zat par

wan ahl-e-sham ne kiya qabza furat par

nargha kiya adu ne shah-e-khush sifat par

zulmat muhit-e-hogai ab-e-hayat par

shab kya gai nasib ka kuchh pher hogaya

hote hi subh kheme mein andher hogaya

kya ro safed fauj-e-khuda hai huzur-e-subh

ai hai un ke aqd ibadat mein hur-e-subh

rah se tulu-e-mehr jabin se zuhur-e-subh

ik samt un ka nur hai ik samt nur-e-subh

sirasjude mein hai tan hai qod-o-qayam mein

kya subh ki bahar hai fauj-e-imam mein

awaz arkbu jo mulaik sunate hain

ghazi namaz parh ke musalle uthate hain

taaqib ki dua yin magar parhte jate hain

sajde ko astana-e-maula pe ate hain

dar par rakhe jabinon ko sab khush khisal hain

ek asman aur behtar hilal hain

misl-e-qamar ye abid-e-shab zinda dar hain

mandin mehr muttaqi-e-rozgar hain

shakl-e-falak ruku mein lail-o-nahar hain

misl-e-zamin sujud mein ye khak sar hain

sajde se un ke khak wazife mein rahti hai

tasbih un ke hath mein takbir kahti hai

dekho khushu ko to larazta hai tan tamam

puchho ruju-e-qalb to dil hai siwe imam

kya zabad hai riya se buri hain ye nek nam

jis ko namaz kahte hain wo ye hai walsalam

raushan hai un ka auj-e-ibadat jahan par

sajjade hain zamin pe namaz asman par

hai dast bos ek ki shamshir ab dar

dar-e-najaf ka subha kisi ke gale ka har

koi khayal-e-hur-e-shahadat se ham kanar

kausar pe ankh ek jari ki pyala dar

kahte hain rah-e-haq mein sharaf ki kami nahin

is rah mein jo khak na ho admi nahin

samjhe hain namuradi duniya ko ye murad

gham un ke dil mein shad hai dil un ka gham mein shad

haruzw mein hai dil ki tarah se khuda ki yad

quran parhna khatm hai un par dam-e-jihad

bazwe jang misl-e-tarazu tale hue

hain zain par ke rahal pe quran khule hue

lashkar mein hai ye akbar-o-abbas ka waqar

wo anjuman mein shama to ye bagh mein bahar

ankhon mein wo nigah to sinon mein ye qarar

wo bazun mein zor ye qabze mein zualfaqar

in donon ki ye fauj-e-khuda mein misal hai

dar-e-najaf wo hai to ye haidar ka lal hai

wo chashm hai palak mein to ye dil hai sine mein

haidar wo kaabe mein ye payambar madine mein

yusuf kuen mein nuh hai goya safine mein

ab-e-baqa wo chashme mein ye zar khazine mein

wo ab motiyon mein ye ik gul hazaron mein

khushbu wo phulon mein ye tajalli sitaron mein

har subh mehr-o-mah ki to kam hai raushni

par dekho un ke arizon ki jalwa afgani

khurshid wo jari hai to hai chand ye ghani

ik samt ko hai dhup aur ik samt chandni

pai na is tarah ki ziya mahtab mein

dekhi na aftab ne ye dhup khwab mein

walshams se rasul-e-khuda hain murad ab

is shams ki shua hai akbar ke rukh mein sab

abbas ka hai mah-e-nabi hashimi laqab

dodar hain un ki mehr-o-ata ke ye roz-o-shab

har subh-o-sham rawe khalaiq pe baz hain

zarra nawaz wo hain ye akhtar nawaz hain

abbas se ye kahte hain akbar ke kyun chacha

kya hoga gard khema bhi hai lashkar-e-jafa

aman ke parde ka mujhe andesha hai bara

bandhenge apna morcha ham bhi piye-o-gha

kheme se fasla na pidar se judai ho

ye tur ho agar to bakhubi larai ho

aman ne kah diya hai ke bakhshungi mein na sher

akbar tumhare hote laga shah par jo tir

hafiz rahunga bap ka main waqt dar-o-gir

lekin ghazab hai ahl-e-haram hun agar asir

khair ab to daman-e-shah-e-khush khu na chhorenge

jo ho so ho hasin ka pahlu na chhorenge

abbas kahte hain ke fida tum pe ho chacha

zinib ke palne ki ye ghairat hai main fida

wo puchhte hain ap kahin hai irada kya

ye hath munh pe pher ke kahte hain dekhna

jine se hath dhote hain mard apni bat par

apna to aj morcha hoga furat par

kahte hain jhum jhum ke zinib ke yadgar

is hamle mein kamand hain apne safon ke par

ibn-e-husn ke husn-e-bayan se hai ashkar

arzaq ka rizq barq mitadun to ho qarar

daawe hain aj haidariyon ko bare bare

chahen to gharb-o-sharq ko le len khare khare

kyun kar na sher hun khalaf-e-sher-e-kibriya

sayyadaniyon ka dudh hai in pyason ne piya

do din se go nasib mein pani hai ne ghiza

lekin wahi hai chehre ki surkhi wahi ziya

sayyad har ek hal mein khush hal rahte hain

khaen na khaen sheron ke munh lal rahte hain

chehron se kya ziya-o-safa ashkar hai

shahr-e-halab unhen ka ik aina dar hai

ik banda tar-e-zulf ka mulk-e-tatar hai

ye bagh rukh bahisht ki fasl-e-bahar hai

galo gun qadon ke chehre hain kis ab-o-tab ke

hain phul ke darakht mein phal aftab ke

abru ne kuchh hilal ka baqi rakha hai nam

rukh ne kiya tamam mah-e-charda ka kam

kis ro se un ke rukh ka ho rukash mah-e-tamam

do hafte wo hai aur ye hain mehrban mudam

qudrat ke sab likhe hue ye khat-o-khal hain

pur nur chehre matla-e-husn-o-jamal hain

aina rubarue jahan hai jo khush numa

wo un ka rushanas hai bas aur wajh kya

ab tak unhen hijabon ke dhoke mein barha

phirta hai aks-e-aina ke ghar mein ja ba ja

par taq dil se aina hai ye gira hua

jo aine ke aks ka hai munh phira hua

dandan bahaduron ke kuja aur dar kuja

do harf dar ke wo bhi hain baham juda juda

dandan mile hue hain judai nahin zara

pas-e-adab se dur hai gar un ko dar kaha

dandan guhar hain makhzan-e-parwardigar ke

dil sharm se chhide hain dar-e-ab dar ke

rukh chashma-e-hayat ahba ke waste

khat lab ka zualfaqar hai aada ke waste

faiz-e-dahan-e-pak hai duniya ke waste

yan jae dam zadan nahin isa ke waste

darj-e-dahan ke danton se rutbe ziyad hain

ye wo sadaf hain jis ke guhar khana zad hain

palkon ke nimchun se zabardast zer hain

yan zindagi se mardum-e-khun khwar sher hain

said afgani pe chashm ki ahu diler hain

ansu nahin palak ke nayastan mein sher hain

ghairat se ab dida har ik shah sawar hai

tegh ik nazar sinan mizha ab dar hai

bandhe kamar jihad pe khud les hai kaman

ghusse se ek post hai bala-e-ustukhwan

is qaus ki hai qaus-e-quzah dil se madh khwan

neze se neza baz-e-falak talib-e-aman

is neze se mubahasai ki kis ko tab hai

goya zaban ki tarah se hazir jawab hai

dhal un ki hai wo badr ki surat dam-e-jidal

is badr se tarashe hain teghon ke so hilal

par hai jihad mein ye wahi badr-e-be zawal

haqqa ke haq pe hain ye quraishi khush khisal

pas un ke dosh par ye sipar ki dalil hai

pusht-o-panah kaaba rab aljalil hai

nagah khema gah se shor-e-buka utha

sajjade se namazi-e-khair-e-alnnasa utha

aur sabz parda-e-dar-e-al-e-aba utha

awaz ai bano ki waris mira utha

razi sakina apni yatimi pe hogain

pichhle se jagti rahen is waqt-e-sogain

kulsum sabr kar chuken mazlum bhai ko

zinib ne bhi luta diya man ki kamai ko

bano ne bhi qubul kiya be ridai ko

ab kaun ro ke hae shah karbalai ko

abid ne kah diya ke rah kar digar mein

ham taziyane khaenge baba bukhar mein

khuddam tazi-e-shah wala ko dar pe lae

maulae hulla posh kafan pahne bahar ae

aur jism se rikab nedonon qadam lagae

zinib pukari hae hasin gharib hae

mekal ru-e-ruh-e-amin nala kash hue

saman-e-maut par mulk almut ghash hue

jangah mein safen jo bandhen fauj-e-sham ki

har tegh zan ko fikr hui nang-o-nam ki

kheme ke dar pe ai sawari imam ki

masnad ulat di maut ne kheralanam ki

tarik chashm-e-ahl-e-haram mein jahan hua

zahra ka chand le ke sitare rawan hua

gardun nashin sawari-e-shah ka ghubar tha

ik ek zarra us ka surayya waqar tha

shah mehr zain the sher ziyan rah dar tha

zahra ka aftab asad par sawar tha

halqe kiye the sab rufaqa is janab ke

ya chodhawen ke chand the gard aftab ke

qabron ke waste jo kharidi thi kuchh zamin

thahri wahan sawari-e-shah-e-falak nashin

lashkar ko apne dekh ke bole imam den

le kar bala khuda ne diye tujh ko ye makin

sab sher haq ke lal hain zahra ke pyare hain

dar-e-najaf hain arsh mualla ke tare hain

kahte the karbala se ye sultan-e-karbala

jomisl sail-e-khail-e-jafa qahr se barha

saf bandhne laga pisar-e-saad be haya

mukhtar us ne maimana ka shis ko kiya

chun chun ke neza dar bhi chalis sud ye

rah war garm ro diye malbus-e-nau diye

azraq ko tir zan diye panjah sad juda

ki us ne zeb mayasara lashkar-e-jafa

aur de ke das hazar jo annan par dagha

saunpa jinah hanzala ko us ne barmala

mil kar gale nabi-o-ali ran mein rote the

ik sar ke katne ke ye saman hote the

saf bandh kar pisar se mukhatib hua umar

akbar imam zade hain to hai mira jigar

apna hasham dikha unhen phir kar idhar idhar

sardaron ko pukara ke han sahab-e-hunar

fauj-e-khuda ke samne jao rajaz parho

ghore uthao neze hilao rajaz parho

chilla dikhaya haramlahu ne barh ke tir ka

yad aya shah ko dudh ugalna saghir ka

chamka jo bhala hilne mein ibn-e-namayyar ka

marqad bala najaf mein janab-e-amir ka

dil pakre ae ahmad-e-mursal madine se

lipta liya hasin ne akbar ko sine se

chamka ke tegh shimr barha fauj-e-sham se

bola mila ke ankh sipah-e-imam se

kis qadr bughz hai use pyase ke nam se

nikla hi parta hai mira khanjar niyam se

sadat par na rahm karun ne karam karun

gar panch halq hun to barabar qalam karun

naga rawan hua pisar-e-saad ka pisar

ham sun rafiq-e-wiar jilau mein idhar idhar

hathon pe khadim age liye tegh aur sipar

aur ik ghulam khole hue sar pe chitr zar

yun rad hua wo akbar-e-zi shan ke samne

firaun jaise musa-e-imran ke samne

mil kar husainiyon ne kaha ai shah-e-umam

ab kab talak sukut ke rukta hai apna dam

qarna bajaya chahte hain bani-e-sitam

yan saf kashi na morcha ne talab na ilm

ab zabt ai wazir yadallah qahr hai

sheron ke munh pe charhte hain rubah qahr hai

shah bole kya irada karen saf kashi ka ham

wan kasrat-e-sipah hai alam hain kai alam

yan dost kya aziz bhi kam zindagi bhi kam

mazlum khaenge miri mazlumi ki qasam

har sal is mahine mein sab khak uraenge

us roz taaziya mira momin uthaenge

ai nida ye arsh se ai hamil-e-bala

us samt zar ke bande hain teri taraf khuda

han jald ab manga ilm-e-fauj-e-kibriya

bandhe para khare hain ziyarat ko ambiya

kis beriq-o-nishan ne buzurgi ye pai hai

tere alam ke sae mein meri khudai hai

abbas-e-nam war ko pukare shah-e-umam

han ai nishan-e-sher-e-khuda lao to alam

khatir nishan rakho ye nishan denge tum ko ham

abbas hukm shah se chale janib-e-haram

pahunche jo khema-e-shah-e-ali waqar mein

dekha khara hua hai alam intizar mein

zinib ne dekh kar rukh-e-abbas zi hasham

khud apne chhote bhai ko uth kar diya alam

ki sat bar nad ali bazun pe dam

sarko jhuka ke chum liye sher ne qadam

tur agya pasand jo haq ke fidai ka

zinib ne sar laga liya sine se bhai ka

abbas le ke rayat shah-e-umam chale

kis shan se ali ka uthakar alam chale

goya liye qabala bagh-e-iram chale

patka alam ka tham ke ahl-e-haram chale

zinib pukari shah-e-najaf yad ate hain

kis shan se nishan liye abbas jate hain

yarab nishan wale ka nam-o-nishan rahe

ye shams be zawal ye gul be khizan rahe

lashkar rahe hasin rahen ye nishan rahe

is hamil-e-alam pe ali ki aman rahe

raushan rahe qamar shah-e-badr-o-hunain ka

wo khak mein mile jo ho dushman hasin ka

is shan se barha ilm aqdas r siwil

sab ambiya jilau mein rawan badal malul

karo bayan arsh ka har ik qadam nuzul

sarnange sath huron ke zer-e-alam batul

ik samt sabz posh jawan rote ate the

hamil pe har qadam pe fida hote ate the

abbas shah ke pas jo pahunche alam liye

iqbal aya pusht pe jah-o-hasham liye

shanon ke bose shah ne ba lutf-o-karam liye

abbas-e-nam dar ne jhuk kar qadam liye

ki arz mujh ko sab mein numudar kar diya

be bal-o-par ko jaafar-e-tayyar kar diya

nagah fizza dauri hui ai hai be hawas

kuchh shah ke kan mein kaha aur phir gai udas

zahra ke lal ko hui tashwish be qayas

ashab puchhne lage a a ke pas pas

namahramon mein kahne ko kya fizza ai thi

bole payam zinib-e-be kis ka lai thi

abbas hath bandh ke bole ke ya imam

mere alam uthane mein to kuchh nahin kalam

aun-o-mohammadan ke pisar hain main hun ghulam

shah ne kaha nahin mujhe bheja hai ye payam

malik ho chaho jaisa jo rutba ho dijiyo

sardar fauj ka mire akbar ko kijiyo

sab ne kaha yahi hai hamara bhi muddaa

akbar pe sar nisar hai jan ap par fida

beta wahan umar ka hai salar fauj ka

sardar hun hamare bhi ham shakl mustafa

go wo pisar ko lakh jawahir panha-e-ga

naqsha kahan se ahmad-e-mursal ka laega

phir shah neki durust saf-e-lashkar-e-khuda

ru-e-zamin hua saf-e-lashkar se khush numa

bini se husn chehre ka ho jis tarah siwa

rawe zamin faqat nazar ata tha daima

arasta jo ran mein saf-e-fauj den hui

sidhi numud bini-e-ru-e-zamin hui

apne habib khas ko to maimana diya

aur mayasara zahir ko shah ne ata kiya

bakhshi jinah qalb ko atfal se ziya

akbar se puchha kyun jigar-e-sher-e-kibriya

is lashkar-e-qalil ke mukhtar hote ho

ik dopahar ke waste salar hote ho

wo bole dopahar ka kise intizar hai

gar ap hukm den abhi banda nisar hai

shah ne kaha yaqin mujhe ai gul izar hai

tera jiwana marg laqab ashkar hai

salar use kya joshah arsh auj ne

dikhlai nazr hathon pe sar rakh ke fauj ne

khemon mein dukhtaran-e-ali haul khati thin

parda utha ke warison ko dekh jati thin

bahr-e-dua musalla barabar bichhati thin

gah-e-alam har is mein zewar barhati thin

baje ke ghul se bachchon ko dahshat jo hoti thi

asghar ke dil pe hath rakhe bano roti thi

zinib sar apna pet ke karti thi ye kalam

hai hai bachchegi kahe ko jan-e-shah-e-anam

faujon ka yan se ta dar-e-kofa hai azhdaham

qasid bulao nama likho aur ye do payam

ghera hai sab ne fatima ke nurain ko

ao madine walo bachao hasin ko

chillati thin ye roke ke aman duhai hai

bi bi tire qamar pe ghata aj chhai hai

zulm-o-jafa ke narghe mein zinib ka bhai hai

baba bachaiye dam mushkil kushai hai

gahe pukarti thi risalat mab ko

nana gahan laga hai tire aftab ko

nazan tha sabr sabr shah-e-haq shanas par

qurban tha hosh ibn-e-ali ke hawas par

dariya ka zohra ab tha sayyad ki pyas par

mayusi as pas thi marne ki as par

man ran mein aur kheme mein man jai roti thi

tanhai par hasin ki tanhai roti thi

is waqt ae shimr-o-umar robaruwe shah

bole sipah kya hui ai sham kam sipah

kyun ham hue tabah ke hazrat huetabah

is lashkar-e-qalil pe tha iftikhar wah

kya rah gaya ke jis pe ye kuchh an-e-ban hai

baiat karen jo ap to ab bhi aman hai

lahaul par h ke kahne lage surur-e-hada

go ab wo fauj hai na alam dar ba wafa

us be kisi mein bhi wahi hai hausla mira

baiat kabhi karunga na main lakh ho jafa

wallah hath doga na fasiq ke hat mein

sarjae ga pe farq na aega bat mein

zalim pukara sar na katao to kya karo

ab ikhtiyar kya jo talab khun baha karo

tegh-e-dusar ko miyan se lo samna karo

do din ki bhuk pyas mein kyunkaro dagha karo

ho bhi kalaiyon mein jo dast-e-khuda ka zor

kyun kar dikhaoge asad kibryan ka zor

shah bole tum samajhte ho nachar hai hasin

sibt-e-nabi hai khalq ka mukhtar hai hasin

karrar ibn-e-haidar-e-karrar hai hasin

qahro jalal khaliq-e-ghaffar hai hasin

sahil pe a ke khun ka dariya bahata hun

ik faqa kash ke dudh ki taqat dikhata hun

age barhe jo shah to wo makarahat gae

apni jagah pe ahl-e-zalalat palat gae

ulti jo astin do alam ulat gae

rakha jo hath qabze pe dil sab ke phat gae

shorish hui zaman pe barna-o-pir ki

khinchti hai zualfaqar janab-e-amir ki

bahar niyam se sar-e-tegh-e-rawan hua

ya astin se yad-e-baiza ayan hua

azh dar nikal ke ghar se shola fishan hua

be parda mehr-e-khusrau kaun-o-makan hua

jauhar nahin wo tegh-e-shah-e-khush khisal mein

dekho chamak rahe hain sitare hilal mein

khinchte hi zualfaqar ne hazrat ko di sada

ai rahnuma kashnda-e-asghar ko to bata

hai kis pare mein qatil ham shakl mastafa

dariya pe hoga naufal-e-makkar-o-be haya

koi husainiyon ka kashnda na chhorungi

main shimr-o-ibn-e-saad ko zinda na chhorungi

daman ko zualfaqar sambhale hue chali

sanche mein phal ke fath ko dhale hue chali

jauhar ki ankhriyon ko nikale hue chali

nalon ki zulf dosh par dale hue chali

khinch kar chali ye chal nai ushuqya ke sath

haftad hath barh gai naz-o-da ada ke sath

saifi chali ke saif-e-yad allah rawan hui

tegh-e-nigah niyam-e-falak mein nihan hui

sufi ki tarah chilla nashin har kaman hui

hasti fana hui to aman be aman hui

zer-e-falak tarapne se is shola bar ke

bijli ke sar pe raad gira chikh mar ke

ankhen zira ki tegh pe girwida hogain

manindkah barchhiyan kahida hogain

sahmen kamanen dosh pe chaspida hogain

teghen simat ke qabzon mein poshida hogain

harbe to hath se gire hath astin se

sar tan se paon ran se ran utha zamin se

wo tegh yun chamak ke siwe ras chup gai

kora lagaya raad nebijli tarap gai

ban kar sipah ke liye larze ki tap gai

dozah ke sholon ki kafani tan pe nip gai

dil nariyon ka tap ki hararat se jal gaya

kuchh kuchh bukhar-e-tegh ke dil ka nikal gaya

naz wada se laila fath-o-zafar chali

majnun hazaron hogae us ke jidhar chali

fauj-e-adu mein maut ki ban kar khabar chali

maghrur khud saron pe jo tegh-e-do sarchali

shaffaf-o-saf jang ka maidan kardiya

tore pare safon ko pareshan kardiya

ye kilk-e-tegh fard sipar par jo chal gaya

hokar nidhal dhal ka chehra badal gaya

fauran sipar mein dub ke bahar ye phal gaya

goya gahan mein ake mah-e-nau nikal gaya

tan gharb tha na sharq tha ahl-e-jidal ka

par us pe tha tulu-o-ghurub is hilal ka

abru ki shakl thi kham-e-shamshir se ayan

chalte hi ran mein bandh gaya bhaunchal ka saman

yun jism-e-raasha dar se ruhen huin rawan

jis tarah bhagen zalzale mein chhor kar makan

pesh-e-nigah maut thi tegh-e-dusar na thi

kuchh tan badan ki khaibariyon ko khabar na thi

ab-e-dam-e-husam se barsat hogai

aisi jhari lagi ke ghata mat hogai

tapon ki rah kucha-e-zulmat hogai

rang-e-sipah-e-sham ura rat hogai

tha shor dhup dekhne ko sab taraste hain

chhaya hai abr-e-tegh-e-ali sar baraste hain

shahbaz-e-tegh ne sipron ko ura diya

chun chun ke afsaron ke saron ko ura diya

khanjar qalam kiye tabron ko ura diya

paspa kiya saron ko paron ko ura diya

barash ki ye bandhi thi hua razm gah mein

har samt khak urati thi jangi sipah mein

zulmat mein ane jane ko ab-e-hayat thi

aur raushni mein nayar-e-aazam ki zat thi

andher karne ko ye qayamat ki rat thi

munh se nikalna us ke liye ek bat thi

ran mein to kafiron ke faqat halq par phiri

par shahron mein zabanon pe misl-e-khabar phiri

akhir pukare sab ke payambar ka wasta

ai tegh naujawani akbar ka wasta

ai tegh ruh fateh-e-khaibar ka wasta

ai tegh khurdsali asghar ka wasta

kofe ki ya ke sham ke jane ki rah de

pahunche saza ko apni hamen to panah de

qabze ko chum kar ye pukare shah-e-zaman

bas zualfaqar bas ke larazte hain sab ke tan

shamshir ne jawab diya ho ke naara zan

pahle hi kah chuki hun ye hazrat se main sukhan

lashon se sham-o-kofa ke maidan bharungi mein

dam lungi jab ke shimr ko be dam karungi mein

ai zualfaqar bas shudani ye nahin hai ah

to us ka sar na kat sakegi khuda gawah

shabbir ka gila wahi katega be gunah

khanjar hai us ka aur payambar ki bosa gah

jane de qatl shimr se kya tujh ko kam hai

ai tegh ye hasin ke qatil ka nam hai

roti hui wo tegh dara i niyam mein

aur shah-e-be bapah ghire fauj-e-sham mein

ae mulk-e-falak se rikab-e-imam mein

har ik ye nauha karta tha is azhdham mein

ya sher kar digar bacha lo hasin ko

daman main apne a ke chhupullu hasin ko

khak-e-shifa saron pe urate chale malak

khun-e-jigar se subha-e-yaqut thi palak

pahunche the ta falak ke larazne lage falak

aur ye fughan zamin se gai asman talak

fariyad goshwara-e-arsh-e-khuda gira

lo khak par sitara-e-khair-e-alnnasa gira

girte hi khak par shah den ko ghash agya

phir bhi na koi pyase ko pani pila gaya

khanjar laga gaya koi nira laga gaya

kholi jo ankh shah ne har ik thar tharra gaya

dushman bhi kah uthe ye payambar ka phul hai

ankhon mein saf gardish-e-chashm-e-rasul hai

par ah ah shimr ne barh kar ghazab kiya

sine pe moza halq pe khanjar ko rakh diya

ae lahad ko chhor ke mahbub-e-kibriya

daure najaf se rote hue shah-e-ausiya

zahra pukari ye dil-e-muztar ka chain hai

mera hasin hai are mera hasin hai

ai shimr mustafa ki risalat ka wasta

ai shimr murtaza ki imamat ka wasta

ai shimr ahl-e-bit ki hurmat ka wasta

ai shimr kibriya ki adalat ka wasta

sadqa nabi ki ruh ka haidar ke sabr ka

tu gul na kar charagh payambar ki qabr ka

chillai dar se zinib be kis bhi wa akha

aman to aen mein bhi nikal aun nange pa

boli sakina rok lun main khanjar-e-jafa

baqir pukar a aroke mein sujan se fida

shayad ye tegh tham le maasum jan kar

dada tire gale pe gila rakh dun an kar

phir mur ke zer-e-tegh ye bole shah-e-umam

zinib tujhe shahadat shabbir ki qasam

bithla mire yatyimon ko kheme mein ek dam

batta hai dhyan mahw-e-jamal-e-khuda hain ham

bachchon ko le ke dewrhi se zinib to hat gai

yan bosa gah ahmad-e-mukhtar kat gai

barpa hua haram mein qayamat ka shoroshain

na sinon mein qarar raha na dilon mein chain

sun sun ke qatl gah mein khairulnnisa ke bain

zinib pukari bi biyo mare gae hasin

tha waqt-e-asr bhai se zinib jo chhut gai

maghrib talak hasin ki sarkar lut gai

bas ai dabir dhum hai is shoroshain ki

lutti hai bargah-e-shah-e-mashriqain ki

zinib ke age jalti thi masnad hasin ki

hilti thi qabr fateh-e-badr-o-hunain ki

khaliq se kah ke bakhsh dar-e-muddaa mujhe

hazrat ki karbala ka muraqqaa dikha mujhe