پیغام غم جگر کا گلزار تک نہ پہنچا

پیغام غم جگر کا گلزار تک نہ پہنچا

نالہ مرا چمن کی دیوار تک نہ پہنچا

اس آئینے کے مانند زنگار جس کو کھاوے

کام اپنا اس کے غم میں دیدار تک نہ پہنچا

جوں نقش پا ہے غربت حیران کار اس کی

آوارہ ہو وطن سے جو یار تک نہ پہنچا

لبریز شکوہ تھے ہم لیکن حضور تیرے

کار شکایت اپنا گفتار تک نہ پہنچا

لے چشم نم رسیدہ پانی چوانے کوئی

وقت اخیر اس کے بیمار تک نہ پہنچا

یہ بخت سبز دیکھو باغ زمانہ میں سے

پژمردہ گل بھی اپنی دستار تک نہ پہنچا

مستوری خوبروئی دونوں نہ جمع ہوویں

خوبی کا کام کس کی اظہار تک نہ پہنچا

یوسف سے لے کے تا گل پھر گل سے لے کے تا‌ شمع

یہ حسن کس کو لے کر بازار تک نہ پہنچا

افسوس میرؔ وے جو ہونے شہید آئے

پھر کام ان کا اس کی تلوار تک نہ پہنچا

paigham gham jigar ka gulzar tak na pahuncha

nala mira chaman ki diwar tak na pahuncha

is aine ke manind-e-zangar jis ko khawe

kam apna us ke gham mein didar tak na pahuncha

jun naqsh-e-pa hai ghurbat hairan kar us ki

awara ho watan se jo yar tak na pahuncha

labrez shikwa the ham lekin huzur tere

kar-e-shikayat apna guftar tak na pahuncha

le chashm-e-nam rasida pani chiwane koi

waqt-e-akhir us ke bimar tak na pahuncha

ye bakht-e-sabz dekho bagh-e-zamana mein se

pazhmurda gul bhi apni dastar tak na pahuncha

masturi khubrui donon na jama howen

khubi ka kam kis ki izhar tak na pahuncha

yusuf se le ke ta gul phir gul se le ke ta shama

ye husn kis ko le kar bazar tak na pahuncha

afsos mir we jo hone shahid ae

phir kam un ka us ki talwar tak na pahuncha