پھیر روز فراق یار آیا

پھیر روز فراق یار آیا

نامہ بر آہ زار زار آیا

تیرے جانے سے فتنہ ہو تیار

بہ سر چشم اشک بار آیا

جھاڑا مرقد پہ میرے جب دامن

آسماں کا گویا غبار آیا

مے سے توبہ تو کر نہیں سکتا

کیا کروں موسم بہار آیا

مارا جاوے گا بھاگ اے ناصح

دیکھ یہ نازنیں سوار آیا

کسی مخلوق کو خدا نہ دکھائے

جو کہ مجھ پر در انتظار آیا

اس کی بیداد کا خدا دے اجر

ہاتھ میں لے کے ذو الفقار آیا

کہتا ہے سر جھکا جو عاشق ہے

میں تو اب مائل شکار آیا

آفریدیؔ سمجھ حیات ابد

قتل کو تیرے گر وہ یار آیا

پیشوائی کو اس کی جا جلدی

کہہ کہ حاضر گناہ گار آیا

تجھے قاسمؔ علی خدا کی قسم

کیسے ظالم پہ اعتبار آیا

pher roz-e-firaq-e-yar aya

nama bar ah zar zar aya

tere jane se fitna ho tayyar

ba sar-e-chashm-e-ashk bar aya

jhara marqad pe mere jab daman

asman ka goya ghubar aya

mai se tauba to kar nahin sakta

kya karun mausam-e-bahar aya

mara jawega bhag ai naseh

dekh ye naznin sawar aya

kisi makhluq ko khuda na dikhae

jo ke mujh par dar intizar aya

us ki bedad ka khuda de ajr

hath mein le ke zu alfaqar aya

kahta hai sar jhuka jo ashiq hai

main to ab mail-e-shikar aya

afridi samajh hayat-e-abad

qatl ko tere gar wo yar aya

peshwai ko us ki ja jaldi

kah ke hazir gunah gar aya

tujhe qasim ali khuda ki qasam

kaise zalim pe etibar aya