پہلو کو ترے عشق میں ویراں نہیں دیکھا

پہلو کو ترے عشق میں ویراں نہیں دیکھا

اس دل کو کبھی خالی از ارماں نہیں دیکھا

صورت کو مری دیکھ کے حیرت ہے تمہیں کیا

تم نے تو مرا حال پریشاں نہیں دیکھا

موسیٰ ہوئے بے ہوش تجلئ لقا سے

طالب تھے مگر جلوۂ جاناں نہیں دیکھا

روتے ہیں گناہوں پہ وہی جن میں ہے ایماں

کافر کو کبھی ہم نے پشیماں نہیں دیکھا

دیکھا جو مرا داغ جگر ہنس کے وہ بولے

ایسا تو چراغ تہ داماں نہیں دیکھا

اے درد جگر چین ذرا لینے دے مجھ کو

تجھ سا بھی کوئی جان کا خواہاں نہیں دیکھا

سر کٹ کے گرا شوق سے قاتل کے قدم پر

ایسا بھی کوئی بندۂ احساں نہیں دیکھا

رونے پہ مری تم کو تحیر یہ عبث ہے

کیا تم نے کبھی ابر کو گریاں نہیں دیکھا

دیکھی ہے بہت آپ نے آئینہ کی حیرت

عاشق کا مگر دیدۂ حیراں نہیں دیکھا

سرگشتہ وہ صحرائے مصیبت میں نہ ہوگا

جس نے تری زلفوں کو پریشاں نہیں دیکھا

پوچھا جو جمیلہؔ سے تو وہ مجھ سے یہ بولے

دل سا تو کوئی دوسرا ایواں نہیں دیکھا

pahlu ko tire ishq mein wiran nahin dekha

is dil ko kabhi khali az arman nahin dekha

surat ko miri dekh ke hairat hai tumhen kya

tum ne to mira hal-e-pareshan nahin dekha

musa hue be hosh tajalli-e-liqa se

talib the magar jalwa-e-janan nahin dekha

rote hain gunahon pe wahi jin mein hai iman

kafir ko kabhi ham ne pasheman nahin dekha

dekha jo mira dagh-e-jigar hans ke wo bole

aisa to charagh-e-tah daman nahin dekha

ai dard-e-jigar chain zara lene de mujh ko

tujh sa bhi koi jan ka khwahan nahin dekha

sar kat ke gira shauq se qatil ke qadam par

aisa bhi koi banda-e-ehsan nahin dekha

rone pe miri tum ko tahayyur ye abas hai

kya tum ne kabhi abr ko giryan nahin dekha

dekhi hai bahut ap ne aina ki hairat

ashiq ka magar dida-e-hairan nahin dekha

sargashta wo sahra-e-musibat mein na hoga

jis ne tiri zulfon ko pareshan nahin dekha

puchha jo jamilahu se to wo mujh se ye bole

dil sa to koi dusra aiwan nahin dekha