پہلے صف عشاق میں میرا ہی لہو چاٹ

پہلے صف عشاق میں میرا ہی لہو چاٹ

شمشیر نگہ تیری نے کیا کیا نہ کیا کاٹ

گلشن میں ہنسی دیکھ کے اس گل کی یکایک

حسرت سے گئے غنچوں کے یک لخت جگر پھاٹ

اتنا بھی دیا صبر نہ اس نفس دنی کو

کتے کی طرح بیٹھتا قسمت کا دیا چاٹ

دھلوائیے کیا جامۂ عصیاں کو بساؤ

چل کوچ میں دریا کے کنارے ہیں کھڑے گھاٹ

ہو غلۂ خلقت سے نہ سودائے محبت

ہے عشق کی دکان سو بنئے کی نہیں ہاٹ

اک پشم نظر ان کی میں ہے شال دوشالہ

جو بیٹھے بچھا بوریا اور اوڑھ لیا ٹاٹ

ستر دو بہتر ہیں طریق ان سے علاحدہ

ہے عشق کی منزل کی جدی راہ جدی باٹ

عشقیہ کہے شعر و یا مدح و مناقب

عالم کا بنواڑا کہے شاعر نہیں ہے بھاٹ

تب رفع خلش ہوئے میاں دل سے محبؔ کے

کہتے ہیں سو تجھ سے کہے دل کھول کے دکھ باٹ

pahle saf-e-ushshaq mein mera hi lahu chat

shamshir-e-nigah teri ne kya kya na kiya kat

gulshan mein hansi dekh ke us gul ki yakayak

hasrat se gae ghunchon ke yak lakht-e-jigar phat

itna bhi diya sabr na is nafas dini ko

kutte ki tarah baithta qismat ka diya chat

dhulwaiye kya jama-e-isyan ko basao

chal kuch mein dariya ke kinare hain khare ghat

ho ghalla-e-khilqat se na sauda-e-mohabbat

hai ishq ki dukan so baniye ki nahin hat

ik pasham nazar un ki main hai shal doshala

jo baithe bichha boriya aur orh liya tat

satar do behtar hain tariq un se alahida

hai ishq ki manzil ki jadi rah jadi bat

ishqiya kahe sher-o-ya madh-o-manaqib

alam ka banoura kahe shayar nahin hai bhat

tab rafa khalish hue miyan dil se muhib ke

kahte hain so tujh se kahe dil khol ke dukh bat