پڑ گئی آپ پر نظر ہی تو ہے

پڑ گئی آپ پر نظر ہی تو ہے

اک خطا ہو گئی بشر ہی تو ہے

اتنا بھاری نہ ڈالیے موباف

بل نہ کھائے کہیں کمر ہی تو ہے

میری آہوں سے ان کے دل میں اثر

کبھی یوں بھی اڑے خبر ہی تو ہے

پاؤں پھیلائے ہم نے مرقد میں

چلتے چلتے تھکے سفر ہی تو ہے

قدرؔ نے کیا زبان پائی ہے

لوگ کہتے ہیں یہ سحر ہی تو ہے

par gai ap par nazar hi to hai

ik khata ho gai bashar hi to hai

itna bhari na daliye mubaf

bal na khae kahin kamar hi to hai

meri ahon se un ke dil mein asar

kabhi yun bhi ure khabar hi to hai

paon phailae ham ne marqad mein

chalte chalte thake safar hi to hai

qadr ne kya zaban pai hai

log kahte hain ye sahar hi to hai