پچھلے کو اٹھ کھڑا نہ ہو درد جگر کہیں

پچھلے کو اٹھ کھڑا نہ ہو درد جگر کہیں

پہنچے نہ اڑتے اڑتے کہیں سے خبر کہیں

کیفیت حیات سے خالی ہوا ہے دل

او ساقیٔ ازل مرا پیمانہ بھر کہیں

مر جائیں گے تڑپ کے اسیران بدنصیب

سن پائیں گے جو مژدۂ وحشت اثر کہیں

پھڑکا کیے مرقع عالم کے حسن پر

ٹھہری کبھی نہ اہل ہوس کی نظر کہیں

آخر حجاب و شرم کی حد بھی ہے مہرباں

پردہ الٹ نہ دے مری آہ سحر کہیں

دن وعدۂ وصال کا نزدیک آ چکا

پھر دیر کیا ہے یاسؔ ارے کمبخت مر کہیں

pichhle ko uth khara na ho dard-e-jigar kahin

pahunche na urte urte kahin se khabar kahin

kaifiyat-e-hayat se khali hua hai dil

o saqi-e-azal mira paimana bhar kahin

mar jaenge tarap ke asiran-e-badnasib

sun paenge jo muzhda-e-wahshat asar kahin

pharka kiye muraqqa-e-alam ke husn par

thahri kabhi na ahl-e-hawas ki nazar kahin

akhir hijab-o-sharm ki had bhi hai mehrban

parda ulat na de miri ah-e-sahar kahin

din waada-e-wisal ka nazdik a chuka

phir der kya hai yas are kambakht mar kahin