پڑھ کے قاصد خط مرا اس بد زباں نے کیا کہا

پڑھ کے قاصد خط مرا اس بد زباں نے کیا کہا

کیا کہا پھر کہہ بت نامہرباں نے کیا کہا

غیر سے ملنا تمہارا سن کے گو ہم چپ رہے

پر سنا ہوگا کہ تم کو اک جہاں نے کیا کہا

گالیوں کی جھاڑ باندھی قصد سرگوشی میں رات

کیا کہا چاہے تھا میں اس بد گماں نے کیا کہا

سب خراج مصر دے کر تھا زلیخا کو یہ سوچ

مول یوسف سے پسر کا کارواں نے کیا کہا

آہ اے مرغ چمن کچھ تو بھی واقف ہے کہ صبح

گل نے کیا پوچھا تھا ہنس کر باغباں نے کیا کہا

پھر لہو ٹپکے ہے پیارے آج کچھ باتوں کے بیچ

سچ کہو لب سے تمہارے رنگ پاں نے کیا کہا

قائمؔ اس کوچہ سے شب غمگیں نہ آتا تھا یوں ہی

کیا کہوں تجھ سے کہ اس کو پاسباں نے کیا کہا

parh ke qasid khat mira is bad zaban ne kya kaha

kya kaha phir kah but-e-namehrban ne kya kaha

ghair se milna tumhara sun ke go ham chup rahe

par suna hoga ke tum ko ik jahan ne kya kaha

galiyon ki jhar bandhi qasd-e-sargoshi mein rat

kya kaha chahe tha main is bad guman ne kya kaha

sab khiraj-e-misr de kar tha zulekha ko ye soch

mol yusuf se pisar ka karwan ne kya kaha

ah ai murgh-e-chaman kuchh tu bhi waqif hai ke subh

gul ne kya puchha tha hans kar baghban ne kya kaha

phir lahu tapke hai pyare aj kuchh baton ke bich

sach kaho lab se tumhare rang pan ne kya kaha

qaim us kucha se shab ghamgin na ata tha yun hi

kya kahun tujh se ke us ko pasban ne kya kaha