پڑا ہے پاؤں میں اب سلسلہ محبت کا

پڑا ہے پاؤں میں اب سلسلہ محبت کا

برا ہمارا ہوا ہو بھلا محبت کا

جمال صاف کی موسیٰ کو تاب کب آئی

جو دیکھیے تو ہے طالب خدا محبت کا

ہر ایک در پہ ہے گردش میں میرا کاسۂ چشم

وہ شاہ حسن ہوا یہ گدا محبت کا

نہ سیم و زر کی ہے حاجت نہ کچھ حکومت کی

اگال دے کے دیا خوں بہا محبت کا

کدھر سے جاتا تھا اخترؔ یہ کیا ہوا افسوس

خدا بچائے ہوا سامنا محبت کا

para hai paon mein ab silsila mohabbat ka

bura hamara hua ho bhala mohabbat ka

jamal saf ki musa ko tab kab ai

jo dekhiye to hai talib khuda mohabbat ka

har ek dar pe hai gardish mein mera kasa-e-chashm

wo shah-e-husn hua ye gada mohabbat ka

na sim-o-zar ki hai hajat na kuchh hukumat ki

ugal de ke diya khun baha mohabbat ka

kidhar se jata tha akhtar ye kya hua afsos

khuda bachae hua samna mohabbat ka