پھر آئی فصل گل پھر زخم دل رہ رہ کے پکتے ہیں

پھر آئی فصل گل پھر زخم دل رہ رہ کے پکتے ہیں

مگر داغ جگر پر صورت لالہ لہکتے ہیں

نصیحت ہے عبث ناصح بیاں ناحق ہی بکتے ہیں

جو بہکے دخت رز سے ہیں وہ کب ان سے بہکتے ہیں

کوئی جا کر کہو یہ آخری پیغام اس بت سے

ارے آ جا ابھی دم تن میں باقی ہے سسکتے ہیں

نہ بوسہ لینے دیتے ہیں نہ لگتے ہیں گلے میرے

ابھی کم عمر ہیں ہر بات پر مجھ سے جھجکتے ہیں

وہ غیروں کو ادا سے قتل جب بے باک کرتے ہیں

تو اس کی تیغ کو ہم آہ کس حیرت سے تکتے ہیں

اڑا لائے ہو یہ طرز سخن کس سے بتاؤ تو

دم تقدیر گویا باغ میں بلبل چہکتے ہیں

رساؔ کی ہے تلاش یار میں یہ دشت پیمائی

کہ مثل شیشہ میرے پاؤں کے چھالے جھلکتے ہیں

phir ai fasl-e-gul phir zakhm-e-dil rah rah ke pakte hain

magar dagh-e-jigar par surat-e-lala lahakte hain

nasihat hai abas naseh bayan nahaq hi bikte hain

jo bahke dukht-e-raz se hain wo kab un se bahakte hain

koi ja kar kaho ye akhiri paigham us but se

are a ja abhi dam tan mein baqi hai sisakte hain

na bosa lene dete hain na lagte hain gale mere

abhi kam umr hain har bat par mujh se jhijakte hain

wo ghairon ko ada se qatl jab be bak karte hain

to us ki tegh ko ham ah kis hairat se takte hain

ura lae ho ye tarz-e-sukhan kis se batao to

dam-e-taqdir goya bagh mein bulbul chahakte hain

rasa ki hai talash-e-yar mein ye dasht paimai

ke misl-e-shisha mere paon ke chhale jhalakte hain