ٹوٹے جو دانت منہ کی شباہت بگڑ گئی

ٹوٹے جو دانت منہ کی شباہت بگڑ گئی

وہ گھر ہوا خراب جہاں پھوٹ پڑ گئی

وہ زار ہوں جو سانس دم مرگ اکھڑ گئی

میت کنار گور میں کانٹے سی گڑ گئی

ڈھونڈھو چراغ لے کے ضعیفوں گلی گلی

غم ہو گیا شباب جوانی بچھڑ گئی

پھولوں پھلوں میں کیا چمن روزگار میں

میں وہ نہال سبز ہوں گھن جس کی جڑ گئی

چاہا جو مالش کف افسوس کیجیے

ہاتھوں کو یہ ملا کہ ہتھیلی رگڑ گئی

گل آ کے زیر کفش صبا صاف ہو گیا

جوتی جو بے حیا کے پڑی خاک جھڑ گئی

عقدہ کھلا یہ دست حنا بند یار سے

منہدی ہے اپنے چور کی مشکیں جکڑ گئی

وہ گل عرق فشاں نظر آیا جو باغ میں

شبنم پہ اوس آب خجالت سے پڑ گئی

ڈھانپا کفن میں منہ کو جو شرم گناہ سے

میت مری زمیں میں خجالت سے گڑ گئی

اے شادؔ لکھنؤ کی خرابی نہ پوچھئے

بستی بسی بسائی گلوں کی اجڑ گئی

tute jo dant munh ki shabahat bigar gai

wo ghar hua kharab jahan phut par gai

wo zar hun jo sans dam-e-marg ukhar gai

mayyat kanar-e-gor mein kante si gur gai

dhundho charagh le ke zaifon gali gali

gham ho gaya shabab-e-jawani bichhar gai

phulun phalon mein kya chaman-e-rozgar mein

main wo nihal-e-sabz hun ghin jis ki jur gai

chaha jo malish kaf-e-afsos kijiye

hathon ko ye mila ke hatheli ragar gai

gul a ke zer-e-kafsh-e-saba saf ho gaya

joti jo be haya ke pari khak jhar gai

uqda khula ye dast-e-hina band-e-yar se

minhadi hai apne chur ki mushkin jakar gai

wo gul araq fishan nazar aya jo bagh mein

shabnam pe os ab-e-khijalat se par gai

dhanpa kafan mein munh ko jo sharm-e-gunah se

mayyat miri zamin mein khijalat se gur gai

ai shad lakhnau ki kharabi na puchhiye

basti basi basai gulon ki ujar gai