ٹھکانا ہے کہیں جائیں کہاں ناچار بیٹھے ہیں

ٹھکانا ہے کہیں جائیں کہاں ناچار بیٹھے ہیں

اجازت جب نہیں در کی پس دیوار بیٹھے ہیں

یہ مطلب ہے کہ محفل میں منائے اور من جائیں

وہ میرے چھیڑنے کو غیر سے بیزار بیٹھے ہیں

خریدار آ رہے ہیں ہر طرف سے نقد جاں لے کر

وہ یوسف بن کے بکنے کو سر بازار بیٹھے ہیں

اچانک لے نہ لوں بوسہ یہ کھٹکا ان کے دل میں ہے

مرے پہلو میں بیٹھے ہیں مگر ہشیار بیٹھے ہیں

تمہارے عاشقوں میں بے قراری کیا ہی پھیلی ہے

جدھر دیکھو جگر تھامے ہوئے دو چار بیٹھے ہیں

قیامت ہے ستم مردے پہ بھی ان کو گوارا ہے

مرا لاشہ اٹھانے کے لئے اغیار بیٹھے ہیں

لب بام آ کے دکھلا وہ تماشا طور کا تم بھی

بڑے موقعے سے در پر طالب دیدار بیٹھے ہیں

اثرؔ کیوں کر نہ جانوں اس کے در کو قبلۂ عالم

اسی جانب کئی رخ کافر و دیں دار بیٹھے ہیں

thikana hai kahin jaen kahan nachar baithe hain

ijazat jab nahin dar ki pas-e-diwar baithe hain

ye matlab hai ke mahfil mein manae aur man jaen

wo mere chherne ko ghair se bezar baithe hain

kharidar a rahe hain har taraf se naqd-e-jan le kar

wo yusuf ban ke bikne ko sar-e-bazar baithe hain

achanak le na lun bosa ye khatka un ke dil mein hai

mire pahlu mein baithe hain magar hushyar baithe hain

tumhare ashiqon mein be qarari kya hi phaili hai

jidhar dekho jigar thame hue do char baithe hain

qayamat hai sitam murde pe bhi un ko gawara hai

mira lasha uthane ke liye aghyar baithe hain

lab-e-bam a ke dikhla wo tamasha tur ka tum bhi

bare mauqae se dar par talib-e-didar baithe hain

asar kyun kar na janun us ke dar ko qibla-e-alam

usi janib kai rukh kafir-o-din dar baithe hain