پا شکستوں کو جب جب ملیں گے آپ

پا شکستوں کو جب جب ملیں گے آپ

سر راہ طلب ملیں گے آپ

ان سے پوچھا کہ کب ملیں گے آپ

بولے جب جاں بلب ملیں گے آپ

دل یہ کہہ کر خبر کو اس کی چلا

مجھ کو زندہ نہ اب ملیں گے آپ

عرصۂ حشر عید گاہ ہوا

سب سے مل لیں گے جب ملیں گے آپ

وصل میں بھی جبیں پہ ہوگی شکن

توڑنے کو غضب ملیں گے آپ

بے خودوں کو تلاش سے کیا کام

ہر جگہ بے طلب ملیں گے آپ

چھوڑ دی رخ پہ زلف سمجھے ہم

چھپ کے ایک آدھ شب ملیں گے آپ

چھیڑ مطرب ترانۂ شب وصل

ساز عیش و طرب ملیں گے آپ

یار جب مل گیا تو ہم سے جلالؔ

جو نہ ملتے تھے سب ملیں گے آپ

pa shikaston ko jab jab milenge ap

sar-e-rah-e-talab milenge ap

un se puchha ke kab milenge ap

bole jab jan balb milenge ap

dil ye kah kar khabar ko us ki chala

mujh ko zinda na ab milenge ap

arsa-e-hashr eid gah hua

sab se mil lenge jab milenge ap

wasl mein bhi jabin pe hogi shikan

torne ko ghazab milenge ap

be khudon ko talash se kiya kam

har jagah be talab milenge ap

chhor di rukh pe zulf samjhe ham

chhup ke ek adh shab milenge ap

chher mutrib tarana-e-shab-e-wasl

saz-e-aish-o-tarab milenge ap

yar jab mil gaya to ham se jalal

jo na milte the sab milenge ap