از بس بھلا لگے ہے تو میرے یار مجھ کو

از بس بھلا لگے ہے تو میرے یار مجھ کو

بے اختیار تجھ پر آتا ہے پیار مجھ کو

صیاد کا برا ہو جس کے تغافلوں نے

کنج قفس میں رکھا فصل بہار مجھ کو

جاؤں کدھر کو یارو مانند صید خرگہ

مژگاں نے کر رکھا ہے اس کی شکار مجھ کو

اس رفتگی پہ مجھ سے کرتا ہے تو تغافل

ڈانٹے ہے تس پہ الٹا پھر بار بار مجھ کو

میرا قصور کیا ہے صانع کو چاہئے تھا

مقدار حسن دیتا صبر و قرار مجھ کو

فتنہ ہے یا پری ہے جادو ہے یا بلا ہے

آنکھوں سے یہ کیا ہے کس کی دو چار مجھ کو

اے مصحفیؔ تصور اس کا جو سامنے ہے

آتا نہیں شب غم یک دم قرار مجھ کو

az bas bhala lage hai to mere yar mujh ko

be ikhtiyar tujh par ata hai pyar mujh ko

sayyad ka bura ho jis ke taghafulon ne

kunj-e-qafas mein rakha fasl-e-bahar mujh ko

jaun kidhar ko yaro manind-e-said kharga

mizhgan ne kar rakha hai us ki shikar mujh ko

is raftagi pe mujh se karta hai to taghaful

dante hai tis pe ulta phir bar bar mujh ko

mera qusur kya hai sane ko chahiye tha

miqdar-e-husn deta sabr-o-qarar mujh ko

fitna hai ya pari hai jadu hai ya bala hai

ankhon se ye kya hai kis ki do char mujh ko

ai mushafi tasawwur us ka jo samne hai

ata nahin shab-e-gham yak dam qarar mujh ko