ٹک اک انصاف کر اتنی بھی کرتا ہے جفا کوئی

ٹک اک انصاف کر اتنی بھی کرتا ہے جفا کوئی

کرے گا بعد میرے کس توقع پر وفا کوئی

نظر آتا نہیں ثابت گریباں ایک غنچہ کا

چمن پر یہ ستم کرتا ہے اے باد صبا کوئی

گل و لالہ سے شور انگیز تر ہے گی حنا تیری

نہ ہو دیوانہ کیوں کر دیکھ تیرے دست و پا کوئی

عجب سج سے کیا ہے قتل مجھ کو اس کو مت ٹوکو

طلب کرتا ہے ایسے قاتلوں سے خوں بہا کوئی

گزر جا وصل سے گر ہجر میں دیکھے رضا اس کی

محبت میں یقیںؔ لیتا ہے نام مدعا کوئی

tuk ik insaf kar itni bhi karta hai jafa koi

karega baad mere kis tawaqqo par wafa koi

nazar ata nahin sabit gareban ek ghuncha ka

chaman par ye sitam karta hai ai bad-e-saba koi

gul-o-lala se shor angez tar hai gi hina teri

na ho diwana kyun kar dekh tere dast-o-pa koi

ajab saj se kya hai qatl mujh ko us ko mat toko

talab karta hai aise qatilon se khun baha koi

guzar ja wasl se gar hijr mein dekhe raza us ki

mohabbat mein yaqin leta hai nam-e-muddaa koi