ٹھوکریں کھلوائیں کیا کیا پائے بے زنجیر نے

ٹھوکریں کھلوائیں کیا کیا پائے بے زنجیر نے

گردش تقدیر نے جولانی تدبیر نے

عالم اسباب سے کیا فیض ناکامی ملا

راہ پر لا کر مجھے بھٹکا دیا تقدیر نے

کارواں کتنے بگولے بن کے غائب ہو گئے

خاک سے یکساں کیا جولاں گہ تدبیر نے

باز آئے زندگی کے خواب رنگا رنگ سے

دست و پا گم کر دئیے اندیشۂ تعبیر نے

داد خواہی کو اٹھا ہے ذرۂ پامال تک

سوتے فتنوں کو جگایا حشر عالم گیر نے

ماتم حسرت کیا پہلے گریباں پھاڑ کر

پھر دعا دی دشمنوں کو دست بے شمشیر نے

جان دے کر ایک حکم آخری مانا تو کیا

لکھ دیا جب سرکشوں میں کاتب تقدیر نے

واہ کیا کہنا مجسم کر دیا موہوم کو

نقش بندان ازل کی شوخی تحریر نے

جم گئی گرد فنا ایسی کہ چھٹنے کی نہیں

کس غضب کا رنگ پکڑا یاسؔ کی تصویر نے

thokaren khulwaen kya kya pae be zanjir ne

gardish-e-taqdir ne jaulani tadbir ne

alam-e-asbab se kya faiz nakami mila

rah par la kar mujhe bhatka diya taqdir ne

karwan kitne bagule ban ke ghaib ho gae

khak se yaksan kiya jaulan gah-e-tadbir ne

baz ae zindagi ke khwab ranga rang se

dast-o-pa gum kar diye andesha-e-taabir ne

dad khwahi ko utha hai zarra-e-pamal tak

sote fitnon ko jagaya hashr alam gir ne

matam-e-hasrat kiya pahle gareban phar kar

phir dua di dushmanon ko dast-e-be shamshir ne

jan de kar ek hukm-e-akhiri mana to kya

likh diya jab sarkashon mein katib-e-taqdir ne

wah kya kahna mujassam kar diya mauhum ko

naqsh bandan azal ki shokhi-e-tahrir ne

jam gai gard-e-fana aisi ke chhutne ki nahin

kis ghazab ka rang pakra yas ki taswir ne