پاتا نہیں جو لذت آہ سحر کو میں

پاتا نہیں جو لذت آہ سحر کو میں

پھر کیا کروں گا لے کے الٰہی اثر کو میں

آشوب گاہ حشر مجھے کیوں عجیب ہو

جب آج دیکھتا ہوں تری رہ گزر کو میں

ایسا بھی ایک جلوہ تھا اس میں چھپا ہوا

اس رخ پہ دیکھتا ہوں اب اپنی نظر کو میں

جینا بھی آ گیا مجھے مرنا بھی آ گیا

پہچاننے لگا ہوں تمہاری نظر کو میں

وہ شوخیوں سے جلوہ دکھا کر تو چل دیے

ان کی خبر کو جاؤں کہ اپنی خبر کو میں

آہوں نے میری خرمن ہستی جلا دیا

کیا منہ دکھاؤں گا تری برق نظر کو میں

باقی نہیں جو لذت بیداری فنا

پھر کیا کروں گا زندگی بے اثر کو میں

اصغرؔ مجھے جنوں نہیں لیکن یہ حال ہے

گھبرا رہا ہوں دیکھ کے دیوار و در کو میں

pata nahin jo lazzat ah-e-sahar ko main

phir kya karunga le ke ilahi asar ko main

ashob gah hashr mujhe kyun ajib ho

jab aj dekhta hun tiri rah guzar ko main

aisa bhi ek jalwa tha is mein chhupa hua

us rukh pe dekhta hun ab apni nazar ko main

jina bhi a gaya mujhe marna bhi a gaya

pahchanne laga hun tumhari nazar ko main

wo shokhiyon se jalwa dikha kar to chal diye

un ki khabar ko jaun ke apni khabar ko main

ahon ne meri khirman-e-hasti jala diya

kya munh dikhaunga tiri barq-e-nazar ko main

baqi nahin jo lazzat-e-bedari-e-fana

phir kya karunga zindagi-e-be asar ko main

asghar mujhe junun nahin lekin ye hal hai

ghabra raha hun dekh ke diwar-o-dar ko main