پردۂ شب کی اوٹ میں زہرہ جمال کھو گئے

پردۂ شب کی اوٹ میں زہرہ جمال کھو گئے

دل کا کنول بجھا تو شہر تیرہ و تار ہو گئے

ایک ہمیں ہی اے سحر نیند نہ آئی رات بھر

زانوئے شب پہ رکھ کے سر سارے چراغ سو گئے

راہ میں تھے ببول بھی رود شرر بھی دھول بھی

جانا ہمیں ضرور تھا گل کے طواف کو گئے

دیدہ ورو بتائیں کیا تم کو یقیں نہ آئے گا

چہرے تھے جن کے چاند سے سینے میں داغ بو گئے

داغ شکست دوستو دیکھو کسے نصیب ہو

بیٹھے ہوئے ہیں تیز رو سست خرام تو گئے

اہل جنوں کے دل شکیبؔ نرم تھے موم کی طرح

تیشۂ یاس جب چلا تودۂ سنگ ہو گئے

parda-e-shab ki ot mein zohra jamal kho gae

dil ka kanwal bujha to shahr-e-tira-o-tar ho gae

ek hamen hi ai sahar nind na ai rat bhar

zanu-e-shab pe rakh ke sar sare charagh so gae

rah mein the babul bhi rod-e-sharar bhi dhul bhi

jana hamen zarur tha gul ke tawaf ko gae

dida waro bataen kya tum ko yaqin na aega

chehre the jin ke chand se sine mein dagh bu gae

dagh-e-shikast dosto dekho kise nasib ho

baithe hue hain tez ro sust khiram to gae

ahl-e-junun ke dil shakeb narm the mom ki tarah

tesha-e-yas jab chala tauda-e-sang ho gae