پردۂ چشم سے لہو نکلا — منشی ٹھاکر پرساد طالب

Arooz is now on the App Store, for iPhone and iPad. Download →

منشی ٹھاکر پرساد طالب

پردۂ چشم سے لہو نکلا

قطرہ بادل سے سرخ رو نکلا

سخت باتوں سے اس کا دل ٹوٹا

سنگ دل شوخ تند خو نکلا

ہے بجا مار آستیں کہنا

رہ کے پہلو میں دل عدو نکلا

آنکھ کا عشق میں قصور نہیں

دل سراسر مرا عدو نکلا

ایک گل ہی پہ کچھ نہیں موقوف

وہ ہزاروں سے خوبرو نکلا

مے کے پینے میں رات بھر زاہد

نہ تو ہم نکلے اور نہ تو نکلا

آئنہ کل ہوا تھا خانہ نشیں

آج کیوں تیرے روبرو نکلا

جائے کیوں کر کہیں دل وحشی

بستۂ زلف مو بہ مو نکلا

شوق ابرو میں تیرے بدر منیر

ماہ نو بن کے قبلہ رو نکلا

مے پئیں برشکال آئی ہے

سبزہ دنیا میں چار سو نکلا

تجھ سے شرما کے شام مہر چھپا

صبح نکلا تو رد رو نکلا

چشم وحدت پرست وا جو ہوئی

میں نے دیکھا تو مجھ میں تو نکلا

محتسب تو بھی صورت زاہد

دشمن ساغر و سبو نکلا

دوست سمجھے تھے ہم جسے طالبؔ

دشمن جان و آبرو نکلا