پس پردہ تجھے ہر بزم میں شامل سمجھتے ہیں

پس پردہ تجھے ہر بزم میں شامل سمجھتے ہیں

کوئی محفل ہو ہم اس کو تری محفل سمجھتے ہیں

بڑے ہشیار ہیں وہ جن کو سب غافل سمجھتے ہیں

نظر پہچانتے ہیں وہ مزاج دل سمجھتے ہیں

وہ خود کامل ہیں مجھ ناقص کو جو کامل سمجھتے ہیں

وہ حسن ظن سے اپنا ہی سا میرا دل سمجھتے ہیں

سمجھتا ہے گنہ رندی کو تو اے زاہد خود بیں

اور ایسے زہد کو ہم کفر میں داخل سمجھتے ہیں

سمجھتا ہے غلط لیلیٰ کو لیلیٰ قیس دیوانہ

نظر والے تو لیلیٰ کو بھی اک محمل سمجھتے ہیں

سڑی دیوانہ سودائی جو چاہے سو کہے دنیا

حقیقت بیں مگر مجذوبؔ کو عاقل سمجھتے ہیں

pas-e-parda tujhe har bazm mein shamil samajhte hain

koi mahfil ho ham us ko tiri mahfil samajhte hain

bare hushyar hain wo jin ko sab ghafil samajhte hain

nazar pahchante hain wo mizaj-e-dil samajhte hain

wo khud kamil hain mujh naqis ko jo kamil samajhte hain

wo husn-e-zan se apna hi sa mera dil samajhte hain

samajhta hai gunah rindi ko to ai zahid-e-khud bin

aur aise zohd ko ham kufr mein dakhil samajhte hain

samajhta hai ghalat laila ko laila qais diwana

nazar wale to laila ko bhi ik mahmil samajhte hain

sari diwana saudai jo chahe so kahe duniya

haqiqat bin magar majzub ko aqil samajhte hain