پس توبہ حدیث مطرب و پیمانہ کہتے ہیں

پس توبہ حدیث مطرب و پیمانہ کہتے ہیں

یہ اک بھولا ہوا پر آج ہم افسانہ کہتے ہیں

کوئی خون تمنا ہو جھلک آتا ہے آنکھوں میں

اسی کو اتحاد بادہ و پیمانہ کہتے ہیں

تباہی دل کی دیکھی ہے جو ہم نے اپنی آنکھوں سے

ہو اب کیسی ہی بستی ہم اسے ویرانہ کہتے ہیں

فنا ہونے میں سوز شمع کی منت کشی کیسی

جلے جو آگ میں اپنی اسے پروانہ کہتے ہیں

جفا پر صبر سیکھا ہے وفا پر جان جاتی ہے

یہی ہے اور کس کو تہمت مردانہ کہتے ہیں

تمہاری زلف پیچاں میں رہا کیوں کر دل وحشی

تڑا لے جائے جو زنجیر اسے دیوانہ کہتے ہیں

معاذ اللہ تیرا حسن تیری بزم عشرت میں

یہ وہ محفل ہے جس میں شمع کو پروانہ کہتے ہیں

یہاں تو جان تک دے دی نظرؔ پاداش الفت میں

مگر بیداد گر باقی ابھی جرمانہ کہتے ہیں

pas tauba hadis-e-mutrib-o-paimana kahte hain

ye ik bhula hawa par aj ham afsana kahte hain

koi khun-e-tamanna ho jhalak ata hai ankhon mein

usi ko ittihad-e-bada-o-paimana kahte hain

tabahi dil ki dekhi hai jo ham ne apni ankhon se

ho ab kaisi hi basti ham use wirana kahte hain

fana hone mein soz-e-shama ki minnat kashi kaisi

jale jo ag main apni use parwana kahte hain

jafa par sabr sikha hai wafa par jan jati hai

yahi hai aur kis ko tohmat-e-mardana kahte hain

tumhari zulf-e-pechan mein raha kyun kar dil-e-wahshi

tara le jae jo zanjir use diwana kahte hain

maaz allah tera husn teri bazm-e-ishrat mein

ye wo mahfil hai jis mein shama ko parwana kahte hain

yahan to jan tak de di nazar padash-e-ulfat mein

magar bedad gar baqi abhi jurmana kahte hain