پسے ہیں دل زیادہ تر حنا سے

پسے ہیں دل زیادہ تر حنا سے

چلا دو گام بھی جب وہ ادا سے

وہ بت آئے ادھر بھی بھول کر راہ

دعا یہ مانگتا ہوں میں خدا سے

حجاب اس کا ہوا شب مانع دید

نقاب الٹی نہ چہرے کی حیا سے

اشارہ خنجر ابرو کا بس تھا

مجھے مارا عبث تیغ جفا سے

بہت بل کھا رہی ہے زلف جاناں

بچے گی جان کیوں کر اس بلا سے

ہے بہتر اک کرشمے میں ہوں دو کام

مدینے جاؤں راہ کربلا سے

خدا جب بے طلب بر لائے مقصد

اٹھاؤں کیوں نہ ہاتھ اپنے دعا سے

نظامؔ اب عقدۂ دل کیوں نہ حل ہوں

محبت ہے تجھے مشکل کشا سے

pise hain dil ziyada tar hina se

chala do gam bhi jab wo ada se

wo but ae idhar bhi bhul kar rah

dua ye mangta hun main khuda se

hijab us ka hua shab mane-e-did

naqab ulti na chehre ki haya se

ishara khanjar-e-abru ka bas tha

mujhe mara abas tegh-e-jafa se

bahut bal kha rahi hai zulf-e-janan

bachchegi jan kyun kar is bala se

hai behtar ik karishme mein hun do kam

madine jaun rah-e-karbala se

khuda jab be talab bar lae maqsad

uthaun kyun na hath apne dua se

nizam ab uqda-e-dil kyun na hal hun

mohabbat hai tujhe mushkil kusha se