پردے پردے میں بہت مجھ پہ ترے وار چلے
مبارک عظیم آبادیپردے پردے میں بہت مجھ پہ ترے وار چلے
صاف اب حلق پہ خنجر چلے تلوار چلے
دورئ منزل مقصد کوئی ہم سے پوچھے
بیٹھے سو بار ہم اس راہ میں سو بار چلے
کون پامال ہوا اس کی بلا دیکھتی ہے
دیکھتا اپنی ہی جو شوخیٔ رفتار چلے
بے پیے چلتا ہے یوں جھوم کے وہ مست شباب
جس طرح پی کے کوئی رند قدح خوار چلے
چشم و ابرو کی یہ سازش جگر و دل کو نوید
ایک کا تیر چلے ایک کی تلوار چلے
کچھ اس انداز سے صیاد نے آزاد کیا
جو چلے چھٹ کے قفس سے وہ گرفتار چلے
جس کو رہنا ہو رہے قیدئ زنداں ہو کر
ہم تو اے ہم نفسو پھاند کے دیوار چلے
پھر مبارکؔ وہی گھنگھور گھٹائیں آئیں
جانب مے کدہ پھر رند قدح خوار چلے
parde parde mein bahut mujh pe tire war chale
saf ab halq pe khanjar chale talwar chale
duri-e-manzil-e-maqsad koi ham se puchhe
baithe sau bar ham is rah mein sau bar chale
kaun pamal hua us ki bala dekhti hai
dekhta apni hi jo shokhi-e-raftar chale
be piye chalta hai yun jhum ke wo mast-e-shabab
jis tarah pi ke koi rind-e-qadah khwar chale
chashm-o-abru ki ye sazish jigar-o-dil ko nawed
ek ka tir chale ek ki talwar chale
kuchh is andaz se sayyad ne azad kiya
jo chale chhut ke qafas se wo giraftar chale
jis ko rahna ho rahe qaidi-e-zindan ho kar
ham to ai ham nafaso phand ke diwar chale
phir mubarak wahi ghanghor ghataen aen
janib-e-mai kada phir rind-e-qadah khwar chale