پلا ساقی بہار آئے نہ آئے

پلا ساقی بہار آئے نہ آئے

گھٹا پھر بار بار آئے نہ آئے

تجھے ہم دیکھنے آئیں گے سو بار

کوئی دیوانہ وار آئے نہ آئے

کہے جائیں گے درد دل ہم اپنا

کسی کو اعتبار آئے نہ آئے

وہ آ جائیں ادھر کھولے ہوئے بال

نسیم مشک بار آئے نہ آئے

تمہیں آرام سے سونا مبارک

مجھے شب بھر قرار آئے نہ آئے

ہوائے شوق میں اب اڑ چلے ہم

ہوائے کوئے یار آئے نہ آئے

ترے دل میں مسرت کے کھلیں پھول

مرے دل میں بہار آئے نہ آئے

جلیلؔ اب مے کشی کا لطف اٹھاؤ

پھر ابر نو بہار آئے نہ آئے

pila saqi bahar ae na ae

ghata phir bar bar ae na ae

tujhe ham dekhne aenge sau bar

koi diwana war ae na ae

kahe jaenge dard-e-dil ham apna

kisi ko etibar ae na ae

wo a jaen idhar khole hue bal

nasim-e-mushk bar ae na ae

tumhen aram se sona mubarak

mujhe shab bhar qarar ae na ae

hawa-e-shauq mein ab ur chale ham

hawa-e-ku-e-yar ae na ae

tire dil mein masarrat ke khulen phul

mire dil mein bahar ae na ae

jalil ab mai kashi ka lutf uthao

phir abr-e-nau bahar ae na ae