پلا جام ساقی مے ناب کا

پلا جام ساقی مے ناب کا

کہ کچھ حظ اٹھے سیرِ مہتاب کا

دلِ زار کا ماجرا کیا کہوں

فسانہ ہے مشہور سیماب کا

کہاں پھر وہ نایاب، پایا جسے

غلط شوق ہے جنسِ نایاب کا

نہ کیجو غل اے خوش نوایانِ صبح

یہ ہے وقت ان کی شکر خواب کا

محبت نہ ہرگز جتائی گئی

رہا ذکر کل اور ہر باب کا

دمِ سرد سے لا نہ طوفانِ باد

نہ سن ماجرا چشمِ پر آب کا

وہاں بے خودوں کی خبر کون لے

جہاں شغل ہو بادۂ ناب کا

وہاں تیرہ روزوں کی پروا کسے

جہاں شوق ہو سیرِ مہتاب کا

وہ تشخیصِ شخصی بھی جاتی رہی

کنارا الٹتے ہی جلباب کا

میں بے جرم رہتا ہوں خائف کہ واں

جفا میں نہیں دخل اسباب کا

پڑے صبر آرام کی جان پر

مری جانِ بے صبر و بے تاب کا

لبِ لعل کو کس کے جنبش ہوئی

ہوا میں ہے کچھ رنگ عناب کا

نہ کرنا خطا پر نظر شیفتہ

کہ اغماض شیوہ ہے احباب کا

pila jam-e-saqi-e-mai nab ka

ke kuchh haz uthe sair-e-mahtab ka

dil-e-zar ka majra kya kahun

fasana hai mashhur simab ka

kahan phir wo nayab, paya jise

ghalat shauq hai jins-e-nayab ka

na kijo ghul ai khush nawayan-e-subh

ye hai waqt un ki shakar khwab ka

mohabbat na hargiz jatai gai

raha zikr kal aur har bab ka

dam-e-sard se la na tufan-e-bad

na sun majra chashm-e-pur ab ka

wahan be khudon ki khabar kaun le

jahan shaghl ho bada-e-nab ka

wahan tira rozon ki parwa kise

jahan shauq ho sair-e-mahtab ka

wo tashkhis-e-shakhsi bhi jati rahi

kinara ulatte hi jilbab ka

main be jurm rahta hun khaif ke wan

jafa mein nahin dakhl asbab ka

pare sabr aram ki jan par

miri jan-e-be sabr-o-be tab ka

lab-e-laal ko kis ke jumbish hui

hawa mein hai kuchh rang unnab ka

na karna khata par nazar shefta

ke aghmaz-e-shewa hai ahbab ka