وہ ان زلفوں کا عالم ابتری کا

وہ ان زلفوں کا عالم ابتری کا

سبب تھا میری شوریدہ سری کا

پری کی سی ہو جس ظالم کی رفتار

وہ کیا جانے جتن آدم گری کا

عجب اپنا بھی ہے معشوق بے عیب

ہنر ہے جس میں عاشق پروری کا

تری جادو نگاہی جس نے دیکھی

وہ کب قائل ہے سحر سامری کا

رواں ہیں لخت دل یوں چشم نم سے

مسافر جوں چلے رستہ تری کا

شرف اصحاب کہف اوپر رکھے ہے

جو سگ ہے آستان حیدری کا

بدی مت کر کسی کی منتظرؔ تو

اگر خواہاں ہے اپنی بہتری کا

wo in zulfon ka alam abtari ka

sabab tha meri shorida siri ka

pari ki si ho jis zalim ki raftar

wo kya jane jatan adam giri ka

ajab apna bhi hai maashuq be aib

hunar hai jis mein ashiq parwari ka

tiri jadu nigahi jis ne dekhi

wo kab qail hai sahar-e-samri ka

rawan hain lakht-e-dil yun chashm-e-nam se

musafir jun chale rasta tiri ka

sharaf ashab-e-kahf upar rakhe hai

jo sag hai astan-e-haidari ka

badi mat kar kisi ki muntazir to

agar khwahan hai apni behtari ka