اس توقع پہ کہ دیکھوں کبھی آتے جاتے

اس توقع پہ کہ دیکھوں کبھی آتے جاتے

گھس گئے پاؤں رہ‌ دوست میں جاتے جاتے

فکر دوزخ میں ہمیں رفع معاصی کی پڑی

آگ پر دامن تر کو ہیں سکھاتے جاتے

غیر کا زور چلے ان پہ اور ان کا مجھ پر

کہتے ہیں منہ سے ہو کیوں رال اڑاتے جاتے

غیر کو لے کے گرانی کی نہ ٹھہری ہوتی

اپنے دروازے سے مجھ کو نہ اٹھاتے جاتے

کیوں نشاں چھوڑ گئے تیز روان رہ عشق

کعبہ و بت کدہ کو چاہئے ڈھاتے جاتے

آگ سے سبزہ کبھی اور کبھی نخل سے آگ

ہیں ہر اک رنگ میں نیرنگ دکھاتے جاتے

سبزہ بن جائیں گے آخر کو چمن کے سب سرو

شرم سے تیری زمیں میں ہیں سماتے جاتے

مجھ سے بگڑے ہوئے ان کو ہوئی مدت ناظمؔ

بیچ والے ہیں ابھی بات بناتے جاتے

is tawaqqo pe ke dekhun kabhi ate jate

ghis gae paon rah-e-dost mein jate jate

fikr-e-dozakh mein hamen rafa maasi ki pari

ag par daman-e-tar ko hain sikhate jate

ghair ka zor chale un pe aur un ka mujh par

kahte hain munh se ho kyun ral urate jate

ghair ko le ke girani ki na thahri hoti

apne darwaze se mujh ko na uthate jate

kyun nishan chhor gae tez rawan-e-rah ishq

kaaba-o-but kada ko chahiye dhate jate

ag se sabza kabhi aur kabhi nakhl se ag

hain har ik rang mein nairang dikhate jate

sabza ban jaenge akhir ko chaman ke sab sarw

sharm se teri zamin mein hain samite jate

mujh se bigre hue un ko hui muddat nazim

bich wale hain abhi bat banate jate