وہ برق جلوہ دکھائے جمال اگر اپنا

وہ برق جلوہ دکھائے جمال اگر اپنا

تو اے کلیم کریں ہم نثار سر اپنا

وہ ذات پاک کہاں یہ نگار خاک کہاں

جو دیکھے اس کو ذرا دیکھے منہ بشر اپنا

کہیں خزاں ہی بنا وہ کہیں بہار بنا

غرض ہر ایک چمن میں کیا گزر اپنا

بسا ہے میری ہی آنکھوں میں کچھ نہیں وہ شوخ

دلوں میں سب کے بنایا ہے اس نے گھر اپنا

حریم کعبہ میں بت خانہ میں کلیسا میں

بنائے قبلہ تمہیں صاحب نظر اپنا

مقام عبرت و حسرت سرائے فانی ہے

بنا لیا ہے جسے غافلوں نے گھر اپنا

گہر نہ سمجھو ان اشکوں کو ہیں یہ لعل سپید

دکھا رہی ہے یہ اعجاز چشم تر اپنا

سمجھ کے عیب کریں گے حسود مجھ پر طعن

یہی ہے سوچ دکھاؤں کسے ہنر اپنا

فنا کی راہ میں وہ گرم رو ہوں اے عاجزؔ

کہ سایہ بھی نہیں واللہ ہم سفر اپنا

wo barq-e-jalwa dikhae jamal agar apna

tu ai kalim karen ham nisar sar apna

wo zat-e-pak kahan ye nigar khak kahan

jo dekhe us ko zara dekhe munh bashar apna

kahin khizan hi bana wo kahin bahar bana

gharaz har ek chaman mein kiya guzar apna

basa hai meri hi ankhon mein kuchh nahin wo shokh

dilon mein sab ke banaya hai us ne ghar apna

harim-e-kaaba mein but khana mein kalisa mein

banae qibla tumhen sahab-e-nazar apna

maqam-e-ibrat-o-hasrat sarae fani hai

bana liya hai jise ghafilon ne ghar apna

guhar na samjho in ashkon ko hain ye laal saped

dikha rahi hai ye ejaz chashm-e-tar apna

samajh ke aib karenge husud mujh par taan

yahi hai soch dikhaun kise hunar apna

fana ki rah mein wo garm ro hun ai ajiz

ke saya bhi nahin wallah ham safar apna