وہ اٹھ کر قیامت اٹھانا کسی کا

وہ اٹھ کر قیامت اٹھانا کسی کا

وہ دل تھام کر بیٹھ جانا کسی کا

برا گر نہ مانو تو اتنا کہیں ہم

کہ اچھا نہیں ہے ستانا کسی کا

مری آہ نے ان کو تڑپا دیا ہے

جنہیں کھیل تھا دل دکھانا کسی کا

زباں گو ہوئی بند بسمل کی لیکن

لب زخم پر ہے فسانہ کسی کا

اٹھے میرے پہلو سے دل تھام کر وہ

قیامت ہوا یاد آنا کسی کا

مرے دشمن جاں سب اہل جہاں میں

کہ عاشق ہے سارا زمانہ کسی کا

عجب کیا ہزاروں کو بیمار ڈالے

کسی کی عیادت کو جانا کسی کا

ترے وصل سے ناز ہے کیوں عدو کو

رہے گا نہ یکساں زمانہ کسی کا

مجھے اور بھی بد گماں کر رہا ہے

قسم میرے سر کی نہ کھانا کسی کا

تڑپنے میں کیا جانے کیا منہ سے نکلے

نہ دکھتا ہوا دل دکھانا کسی کا

وہ نوشادؔ کا چھیڑنا وصل کی شب

وہ شرما کے آنکھیں جھکانا کسی کا

wo uth kar qayamat uthana kisi ka

wo dil tham kar baith jana kisi ka

bura gar na mano to itna kahin ham

ke achchha nahin hai satana kisi ka

miri ah ne un ko tarpa diya hai

jinhen khel tha dil dikhana kisi ka

zaban go hui band bismil ki lekin

lab-e-zakhm par hai fasana kisi ka

uthe mere pahlu se dil tham kar wo

qayamat hua yad ana kisi ka

mire dushman-e-jan sab ahl-e-jahan mein

ke ashiq hai sara zamana kisi ka

ajab kya hazaron ko bimar dale

kisi ki ayadat ko jana kisi ka

tire wasl se naz hai kyun adu ko

rahega na yaksan zamana kisi ka

mujhe aur bhi bad guman kar raha hai

qasam mere sar ki na khana kisi ka

tarapne mein kya jane kya munh se nikle

na dikhta hua dil dikhana kisi ka

wo naushad ka chherna wasl ki shab

wo sharma ke ankhen jhukana kisi ka