اذن خرام لیتے ہوئے آسماں سے ہم

اذن خرام لیتے ہوئے آسماں سے ہم

ہٹ کر چلے ہیں رہ گزر کارواں سے ہم

کیا پوچھتے ہو جھومتے آئے کہاں سے ہم

پی کر اٹھے ہیں خمکدۂ آسماں سے ہم

کیوں کر ہوا ہے فاش زمانہ پہ کیا کہیں

وہ راز دل جو کہہ نہ سکے راز داں سے ہم

ہمدم یہی ہے رہ گزر یار خوش خرام

گزرے ہیں لاکھ بار اسی کہکشاں سے ہم

کیا کیا ہوا ہے ہم سے جنوں میں نہ پوچھئے

الجھے کبھی زمیں سے کبھی آسماں سے ہم

ہر نرگس جمیل نے مخمور کر دیا

پی کر اٹھے شراب ہر اک بوستاں سے ہم

ٹھکرا دیئے ہیں عقل و خرد کے صنم کدے

گھبرا چکے تھے کشمکش امتحاں سے ہم

دیکھیں گے ہم بھی کون ہے سجدہ طراز شوق

لے سر اٹھا رہے ہیں ترے آستاں سے ہم

بخشی ہیں ہم کو عشق نے وہ جرأتیں مجازؔ

ڈرتے نہیں سیاست اہل جہاں سے ہم

izn-e-khiram lete hue asman se ham

hat kar chale hain rah guzar karwan se ham

kya puchhte ho jhumte ae kahan se ham

pi kar uthe hain khamkada-e-asman se ham

kyun kar hua hai fash zamana pe kya kahen

wo raz-e-dil jo kah na sake raz dan se ham

hamdam yahi hai rah guzar yar khush khiram

guzre hain lakh bar isi kahkashan se ham

kya kya hua hai ham se junun mein na puchhiye

uljhe kabhi zamin se kabhi asman se ham

har nargis-e-jamil ne makhmur kar diya

pi kar uthe sharab har ik bostan se ham

thukra diye hain aql-o-khirad ke sanam kade

ghabra chuke the kashmakash-e-imtihan se ham

dekhenge ham bhi kaun hai sajda taraz-e-shauq

le sar utha rahe hain tire astan se ham

bakhshi hain ham ko ishq ne wo juraten majaz

darte nahin siyasat ahl-e-jahan se ham