وہ جب تک انجمن میں جلوہ فرمانے نہیں آتے

وہ جب تک انجمن میں جلوہ فرمانے نہیں آتے

صراحی رقص میں گردش میں پیمانے نہیں آتے

شریک درد بن کر اپنے بیگانے نہیں آتے

مئے عشرت جو پیتے ہیں وہ غم کھانے نہیں آتے

لپٹ کر شمع کی لو سے لگی دل کی بجھاتے ہیں

پرائی آگ میں جلنے کو پروانے نہیں آتے

اڑاتے ہی پھریں گے عمر بھر وہ خاک صحرا کی

تری زلفوں کے سائے میں جو دیوانے نہیں آتے

جو اپنی آن پر اے نازؔ اپنی جان دیتے تھے

زمانے میں نظر اب ایسے دیوانے نہیں آتے

wo jab tak anjuman mein jalwa farmane nahin ate

surahi raqs mein gardish mein paimane nahin ate

sharik-e-dard ban kar apne begane nahin ate

mai-e-ishrat jo pite hain wo gham khane nahin ate

lipat kar shama ki lau se lagi dil ki bujhate hain

parai ag mein jalne ko parwane nahin ate

urate hi phirenge umr bhar wo khak-e-sahra ki

tiri zulfon ke sae mein jo diwane nahin ate

jo apni an par ai naz apni jan dete the

zamane mein nazar ab aise diwane nahin ate