وہ تغافل کو علاج غم پنہاں سمجھا

وہ تغافل کو علاج غم پنہاں سمجھا

چارہ گر بھی نہ مرے درد کا درماں سمجھا

تاب دیدار نہ لائی نگہ ناز پرست

اور وہ دیدۂ عشاق پہ احساں سمجھا

جمع خاطر نہ ہوئی دید بتاں سے اپنی

دفتر حسن کو اجزائے پریشاں سمجھا

نہ ہوئی جلوہ گہہ ناز کی وسعت معلوم

گو میں ہر ذرہ کو اک دیدۂ حیراں سمجھا

تھی تری یاد بھی کیا انجمن آرائے خیال

دل میں جو شعلہ اٹھا شمع شبستاں سمجھا

شورش عشق کا آسان نہ تھا اندازہ

چاک ہو کر مری وحشت کو گریباں سمجھا

صاحب دل ہے وہی مرشد کامل ہے وہی

میرے چہرے سے جو میرا غم پنہاں سمجھا

ہر نفس شاہد دشواریٔ الفت ہے نظرؔ

سخت مشکل تھا وہی کام جو آساں سمجھا

wo taghaful ko ilaj-e-gham-e-pinhan samjha

chara gar bhi na mire dard ka darman samjha

tab-e-didar na lai nigah-e-naz parast

aur wo dida-e-ushshaq pe ehsan samjha

jam-e-khatir na hui did butan se apni

daftar-e-husn ko ajza-e-pareshan samjha

na hui jalwa gah naz ki wusat maalum

go main har zarra ko ik dida-e-hairan samjha

thi tiri yad bhi kya anjuman ara-e-khayal

dil mein jo shola utha sham-e-shabistan samjha

shorish-e-ishq ka asan na tha andaza

chak ho kar miri wahshat ko gareban samjha

sahab-e-dil hai wahi murshid-e-kamil hai wahi

mere chehre se jo mera gham-e-pinhan samjha

har nafas shahid-e-dushwari-e-ulfat hai nazar

sakht mushkil tha wahi kam jo asan samjha