وہ جب آپ سے اپنا پردا کریں

وہ جب آپ سے اپنا پردا کریں

تو بند قبا کس طرح وا کریں

اگر ہم نہ ان کی تمنا کریں

تو وہ ہم پہ کیوں ناز بے جا کریں

اسے لوگ کیوں مہر تاباں کہیں

جسے دور سے بھی نہ دیکھا کریں

کیا اس نے قتل اور میں نے معاف

عبث اہل شہر اس کا چرچا کریں

پھرے قیس آوارہ ہم وہ نہیں

کہ معشوق کو اپنی رسوا کریں

مرے درد دل کی ہی پرسش دوا

اگر مجھ کو پوچھیں تو اچھا کریں

خدا بے نیاز اور بت سنگ دل

کہو کس سے ہم راہ پیدا کریں

چلو پھر کہیں ان سے ہم حال دل

یہی پھر کہیں گے کہ ہم کیا کریں

جنہیں فصل گل میں نہ ہو دسترس

کہ سامان عشرت مہیا کریں

وہ قمری و بلبل کو مطرب بنائیں

گل و سرو کو جام و مینا کریں

انہیں کیا ہو ناظمؔ قیامت کا ڈر

جو ہر روز اک فتنہ برپا کریں

wo jab ap se apna parda karen

tu band-e-qaba kis tarah wa karen

agar ham na un ki tamanna karen

to wo ham pe kyun naz-e-be ja karen

use log kyun mehr-e-taban kahin

jise dur se bhi na dekha karen

kiya us ne qatl aur main ne muaf

abas ahl-e-shahr us ka charcha karen

phire qais awara ham wo nahin

ke maashuq ko apni ruswa karen

mire dard-e-dil ki hi pursish dawa

agar mujh ko puchhen to achchha karen

khuda be niyaz aur but-e-sang dil

kaho kis se ham rah paida karen

chalo phir kahin un se ham hal dil

yahi phir kahenge ke ham kya karen

jinhen fasl-e-gul mein na ho dastaras

ke saman-e-ishrat mahiya karen

wo qamari-o-bulbul ko mutrib banaen

gul-o-sarw ko jam-o-mina karen

unhen kya ho nazim qayamat ka dar

jo har roz ik fitna barpa karen