Arooz is now on the App Store, for iPhone and iPad. Download →

All poetry

وطن کی لگن

Seemab Akbarabadi (1882–1951)

ہند میرا چمن

اس میں ہوں میں مگن

ہے اسی کی لگن

راحت جان و تن

میرا پیارا وطن

میری عزت ہے یہ

میری دولت ہے یہ

میری عظمت ہے یہ

میری جنت ہے یہ

میرا پیارا وطن

ہند کی خاک سے

پھول کیا کیا اگے

لال پیلے ہرے

مستیوں میں بسے

میرا پیارا وطن

اس کے دریا بڑے

تازگی سے بھرے

باغ پھولے پھلے

لہلہاتے ہوئے

میرا پیارا وطن

اس کے چشمے جواں

اس میں نہریں رواں

جنگل اور وادیاں

اس سے اچھی کہاں

میرا پیارا وطن

یہ وطن ہے مرا

میں ہوں اس پر فدا

اس پہ رکھے خدا

اپنی رحمت سدا

میرا پیارا وطن

دیس کی آس ہوں

دیس کے پاس ہوں

اس کی بو باس ہوں

دیس کا داس ہوں

میرا پیارا وطن