وصل میں خوش کبھی دل ہجر میں جلتے دیکھا

وصل میں خوش کبھی دل ہجر میں جلتے دیکھا

رنگ نیرنگ جہاں سے یہ بدلتے دیکھا

اف رے اے درد جدائی ترے صدمے شب ہجر

دل کی آنکھوں سے لہو ہو کے نکلتے دیکھا

داغ پر داغ اٹھائے جو لکھا تھا وہ ہوا

سچ ہے قسمت کے نوشتہ کو نہ ٹلتے دیکھا

کچھ تو ہے لطف محبت میں جو ہوتے ہیں فنا

شمع پروانہ کو ہر بزم میں جلتے دیکھا

دیکھ کر چلئے زمانہ کا نشیب اور فراز

کھا کے ٹھوکر جو گرا پھر نہ سنبھلتے دیکھا

کون ہوتا ہے برے وقت میں اے یار شریک

خاک پر چھوڑ کے تن روح کو چلتے دیکھا

داغ تازہ دئے نیرنگ فلک نے اس کو

باغ عالم میں جسے پھولتے پھلتے دیکھا

وقت کی قدر نہ کی لہو و لعب میں جس نے

عمر بھر دست تأسف اسے ملتے دیکھا

ہو مرے سامنے کیا خاک مقابل کو فروغ

کھوٹا سکہ کہیں بازار میں چلتے دیکھا

فرقت طالب و مطلوب غضب ہے روشنؔ

جان کو جسم سے رک رک کے نکلتے دیکھا

wasl mein khush kabhi dil hijr mein jalte dekha

rang-e-nairang-e-jahan se ye badalte dekha

uf re ai dard-e-judai tire sadme shab-e-hijr

dil ki ankhon se lahu ho ke nikalte dekha

dagh par dagh uthae jo likha tha wo hua

sach hai qismat ke nawashta ko na talte dekha

kuchh to hai lutf-e-mohabbat mein jo hote hain fana

shama parwana ko har bazm mein jalte dekha

dekh kar chaliye zamana ka nasheb aur faraz

kha ke thokar jo gira phir na sambhalte dekha

kaun hota hai bure waqt mein ai yar sharik

khak par chhor ke tan ruh ko chalte dekha

dagh-e-taza diye nairang-e-falak ne us ko

bagh alam mein jise phulte phalte dekha

waqt ki qadr na ki lahu-o-laab mein jis ne

umr bhar dast-e-tasaf use milte dekha

ho mire samne kya khak muqabil ko farogh

khota sikka kahin bazar mein chalte dekha

furqat-e-talib-o-matlub ghazab hai raushan

jan ko jism se ruk ruk ke nikalte dekha