وعدہ رہا نہ یاد مرے مست خواب کو

وعدہ رہا نہ یاد مرے مست خواب کو

اب کیا جواب دوں دل پر اضطراب کو

زیبا غرور و ناز تھا تیرے شباب کو

ٹھکرا دیا مرے دل خانہ خراب کو

چمکے جو داغ دل مرے روز سیاہ میں

تارے دکھائی دینے لگے آفتاب کو

میدان حشر میں نہ قیامت بپا ہو اور

میں دل سنبھالوں آپ سنبھالیں نقاب کو

لاکھوں میں چن لیا تمہیں روز شمار بھی

دیکھو ذرا مری نگہ انتخاب کو

بھر آئی آنکھ جب کبھی یاد آ گئی وہ رات

بھولا نہ آج تک میں جوانی کے خواب کو

صفدرؔ کہاں میں اور کہاں حضرت ریاض

نسبت مگر چراغ سے ہے آفتاب کو

waada raha na yad mire mast-e-khwab ko

ab kya jawab dun dil par iztirab ko

zeba ghurur-o-naz tha tere shabab ko

thukra diya mire dil khana kharab ko

chamke jo dagh-e-dil mire roz-e-siyah mein

tare dikhai dene lage aftab ko

maidan-e-hashr mein na qayamat bapa ho aur

main dil sambhalun ap sambhalen naqab ko

lakhon mein chun liya tumhen roz-e-shumar bhi

dekho zara miri nigah-e-intikhab ko

bhar ai ankh jab kabhi yad a gai wo rat

bhula na aj tak main jawani ke khwab ko

safdar kahan main aur kahan hazrat-e-riyaz

nisbat magar charagh se hai aftab ko