Arooz is now on the App Store, for iPhone and iPad. Download →

All poetry

وطن کا راگ (افسر میرٹھی ,I)

افسر میرٹھی

بھارت پیارا دیش ہمارا سب دیشوں سے نیارا ہے

ہر رت ہر اک موسم اس کا کیسا پیارا پیارا ہے

کیسا سہانا کیسا سندر پیارا دیس ہمارا ہے

دکھ میں سکھ میں ہر حالت میں بھارت دل کا سہارا ہے

بھارت پیارا دیش ہمارا سب دیشوں سے نیارا ہے

سارے جگ کے پہاڑوں میں بے مثل پہاڑ ہمالہ ہے

پربت سب سے اونچا ہے یہ پربت سب سے نرالا ہے

بھارت کی رکھشا کرتا ہے بھارت کا رکھوالا ہے

لاکھوں چشمے بہتے ہیں اس میں لاکھوں ندیوں والا ہے

بھارت پیارا دیش ہمارا سب دیشوں سے نیارا ہے

گنگا جی کی پیاری لہریں گیت سناتی جاتی ہیں

صدیوں کی تہذیب ہماری یاد دلاتی جاتی ہیں

بھارت کی گلزاروں کو سرسبز بناتی جاتی ہیں

کھیتوں کو ہریالی دیتی پھول کھلاتی جاتی ہیں

بھارت پیارا دیش ہمارا سب دیشوں سے نیارا ہے

ہرے بھرے ہیں کھیت ہمارے دنیا کو ان دیتے ہیں

چاندی سونے کی کانوں سے ہم جگ کو دھن دیتے ہیں

پریم کے پیارے پھول کی خوشبو گلشن گلشن دیتے ہیں

امن و اماں کی نعمت سب کو بھر بھر دامن دیتے ہیں

بھارت پیارا دیش ہمارا سب دیشوں سے نیارا ہے

کرشنؔ کی بنسی نے پھونکی ہے روح ہماری جانوں میں

گوتمؔ کی آواز بسی ہے محلوں میں میدانوں میں

چشتیؔ نے جو دی تھی مے وہ اب تک ہے پیمانوں میں

نانکؔ کی تعلیم ابھی تک گونج رہی ہے کانوں میں

بھارت پیارا دیش ہمارا سب دیشوں سے نیارا ہے

مذہب کچھ ہو ہندی ہیں ہم سارے بھائی بھائی ہیں

ہندو ہیں یا مسلم ہیں یا سکھ ہیں یا عیسائی ہیں

پریم نے سب کو ایک کیا ہے پریم کے ہم شیدائی ہیں

بھارت نام کے عاشق ہیں ہم بھارت کے سودائی ہیں

بھارت پیارا دیش ہمارا سب دیشوں سے نیارا ہے